ԱՄՆ նախագահ Դոնալդ Թրամփը NBC News-ին տված հարցազրույցում հայտարարել է, որ Ռուսաստանի վերաբերյալ հանդես կգա «լուրջ հայտարարությամբ»։
Նրա խոսքով՝ ինքը «հիասթափված է Ռուսաստանից»։ «Բայց տեսնենք, թե ինչ տեղի կունենա հաջորդ մի քանի շաբաթներին»,- ասել է Թրամփը։
«Կարծում եմ՝ երկուշաբթի Ռուսաստանի վերաբերյալ լուրջ հայտարարություն կանեմ»,- հավելել է Սպիտակ տան ղեկավարը՝ առանց մանրամասների մեջ մտնելու։
ԱՄՆ նախագահը նշել է, որ
հակառուսական նոր պատժամիջոցներ սահմանելու վերաբերյալ վերջնական որոշումը իրենը
կլինի. «Նրանք (ԱՄՆ Կոնգրեսը) պատրաստվում են ընդունել շատ
լուրջ և շատ խիստ պատժամիջոցային օրինագիծ, բայց նախագահը կորոշի՝ մտադի՞ր է դա անել, թե՞ ոչ»,- ասել է նա։
Թրամփը
բացահայտել է ԱՄՆ-ի, ՆԱՏՕ-ի և Ուկրաինայի միջև ամերիկյան զենքի մատակարարման
վերաբերյալ «նոր համաձայնագրի» մանրամասները: Խոսքն այն մասին է, որ ԱՄՆ-ը սպառազինություն կուղարկի ՆԱՏՕ-ին, այնուհետև
դաշինքը կմատակարարի այն Ուկրաինային և կվճարի դրա համար, բացատրել է նա: ԱՄՆ նախագահի խոսքով՝ համաձայնագիրը ձեռք է բերվել անցյալ
ամիս ՆԱՏՕ-ի գագաթնաժողովում: «Մենք զենք ենք ուղարկում ՆԱՏՕ-ին, և ՆԱՏՕ-ն վճարում է այդ զենքի ամբողջ արժեքը»,- բացատրել է Թրամփը:
