ԱՄՆ սենատոր Ռիչարդ Բլյումենտալը հայտարարել է, որ Ռուսաստանի նախագահ Վլադիմիր Պուտինը «արժանի չէ լրացուցիչ ժամանակի», և կոչ է արել արագացնել Ռուսաստանի Դաշնության դեմ պատժամիջոցների մասին օրինագծի քննարկումը։ Նա այս մասին ասել է ուկրաինական «Суспільне» հեռուստաալիքին տված մեկնաբանության մեջ։

«Ես համաձայն եմ, որ Վլադիմիր Պուտինը արժանի չէ լրացուցիչ ժամանակի, և մենք պետք է արագացնենք պատժամիջոցների մասին օրինագծի քվեարկությունը։ Այն ամենը, ինչ անում է նախագահը, ճիշտ ուղղությամբ է, բայց ես ակտիվորեն կողմ եմ, որ պատժամիջոցները լինեն 500%, ոչ թե 100%»,- ընդգծել է Բլյումենտալը։

Նրա խոսքով՝ Սենատում արդեն կան նախաձեռնության 85 կողմնակիցներ, և լրիվ իրատեսական է դրա ընդունման համար անհրաժեշտ 90 ձայնի ապահովումը։

«Մենք պետք է օգտվենք պահից և աջակցություն ցուցաբերենք Ուկրաինային։ Քվեարկությունը հասանելի և անհրաժեշտ նպատակ է»,- հավելել է նա։

Սենատորը նշել է, որ պատժամիջոցների մասին օրինագիծը կարող է կարևոր դեր խաղալ պատերազմի ավարտի գործում. «Պուտինը պետք է հասկանա սա»։

Միևնույն ժամանակ ԱՄՆ Պետդեպարտամենտի մամուլի քարտուղար Թեմի Բրյուսը, մեկնաբանելով ԱՄՆ նախագահ Դոնալդ Թրամփի գործողությունները, նշել է, որ ոմանք կարող են սխալ մեկնաբանել նրա զսպվածությունը Ռուսաստանի նկատմամբ։

«Նա համբերատար է եղել, և դա հնարավոր է որոշների կողմից սխալ հասկացվել, բայց կարծում եմ, որ այդ մեկնաբանությունների ժամանակն անցել է»,- ասել է Բրյուսը։

Հիշեցնենք, որ Թրամփը կրճատել է հրադադարի համար Պուտինին նախկինում ներկայացրած ժամկետը՝ 50 օրից դարձնելով մինչև 10 օր։