ԱՄՆ նախագահ Դոնալդ Թրամփը հայտնել է, որ իր հատուկ բանագնաց Սթիվ Ուիթկոֆը կայցելի Ռուսաստան ԱՄՆ առաջնորդի կողմից Մոսկվային տրված 10-օրյա վերջնաժամկետի ավարտի նախօրեին, որը ԱՄՆ նախագահը տվել էր Մոսկվային Ուկրաինայում կրակը դադարեցնելու համար, հաղորդում է AFP-ն։

Թրամփը լրագրողներին ասել է, որ Ուիթկոֆը կայցելի Ռուսաստան օգոստոսի 6-ին կամ 7-ին. «Նրանք ուզում են տեսնել նրան։ Նրանք խնդրել են հանդիպում, այնպես որ կտեսնենք՝ ինչ դուրս կգա դրանից»։

Լրագրողների հարցին՝ ի՞նչ ուղերձ է Ուիթկոֆը փոխանցելու Մոսկվային, և արդյոք Ռուսաստանը կարո՞ղ է ինչ-որ բան անել պատժամիջոցներից խուսափելու համար, Թրամփը պատասխանել է. «Այո, [Ռուսաստանը կարող է] պայմանավորվել, որպեսզի մարդիկ դադարեն մահանալ»։ Այնուհետև Դոնալդ Թրամփը հավելել է. «Կլինեն պատժամիջոցներ, բայց նրանք, կարծես, բավականին լավ են կարողանում դրանք շրջանցել։ Գիտեք, նրանք խորամանկ են և վատ չեն պատժամիջոցները շրջանցելու հարցում, այնպես որ կտեսնենք՝ ինչ կլինի։ Բայց հիմա Սթիվը կենտրոնացած է սահմանի վրա՝ նկատի ունեմ Գազայում իրավիճակը, մարդկանց սննդով ապահովելով»։

Լրագրողների հետ զրույցում Թրամփը նաև ասել է, որ երկու միջուկային սուզանավերը, որոնք նա տեղակայել է Ռուսաստանի նախկին նախագահ Դմիտրի Մեդվեդևի հետ առցանց վեճից հետո, այժմ «տարածաշրջանում» են։ Նա չի մանրամասնել սուզանավերի տեսակը կամ դրանց տեղակայման վայրը։