Ռուսաստանի նախագահ Վլադիմիր Պուտինը ձգձգում է Ուկրաինայում պատերազմը
դադարեցնելու հարցով խաղաղության բանակցությունները, սակայն Ամերիկայի կողմից նոր
պատժամիջոցների սպառնալիքը նրան ստիպել է վերանայել իր ռազմավարությունը: Այս
մասին հայտարարել է ԱՄՆ Պետդեպարտամենտի մամուլի քարտուղար Թեմի Բրյուսը։
Ինչպես հաղորդում է NewsNation-ը, մեկնաբանելով հարցը, թե ինչու է ԱՄՆ
նախագահ Դոնալդ Թրամփը վստահ, որ Պուտինը կրկին չի խաբում իրեն, Բրյուսը նշել է՝ Ռուսաստանի առաջնորդը հազվադեպ
չէ, որ ձգձգում է բանակցային գործընթացը՝ փորձելով ժամանակ շահել։
«Երբեմն իսկապես փորձեր են ձեռնարկվում գործընթացը ձգձգելու, խաղի մեջ այլ
խաղացողների ներքաշելու։ Մենք տեսնում ենք, որ Պուտինի համար սա կարող է ժամանակ
շահելու և իրավիճակը իր օգտին փոխելու միջոց լինել։ Խոսքը միայն պատերազմի մասին
չէ, այլև տնտեսության»,- հայտարարել է Պետդեպարտամենտի ներկայացուցիչը։
Նրա խոսքով՝ Թրամփի կողմից տնտեսական միջոցներ՝ ներառյալ երկրորդային կամ
նույնիսկ ուղղակի պատժամիջոցներ կիրառելու պատրաստակամության մասին հստակ
ազդանշանը կարող է դառնալ շրջադարձային կետ և ազդել Պուտինի հաշվարկների վրա։
