ԱՄՆ նախագահ Դոնալդ Թրամփը Ուկրաինայի և Եվրամիության առաջնորդների հետ բանակցությունների արդյունքներով հայտարարել է Ուկրաինայի
և ՌԴ նախագահներ Վլադիմիր Զելենսկու և Վլադիմիր Պուտինի անձնական հանդիպման նախապատրաստման մասին:
«Մենք քննարկեցինք Ուկրաինայի համար անվտանգության
երաշխիքները, որոնք կտրամադրեն եվրոպական երկրները՝ Միացյալ Նահանգների համակարգմամբ:
(Այնուհետև) ես զանգահարեցի նախագահ Պուտինին և սկսեցի նախապատրաստվել նախագահ
Պուտինի ու նախագահ Զելենսկու միջև հանդիպմանը: Դրանից հետո կլինի եռակողմ
հանդիպում (Ռուսաստանի, Ուկրաինայի նախագահները)՝ և ես»,- գրել է Թրամփը իր Truth
Social սոցիալական ցանցում:
Գերմանիայի կանցլեր Ֆրիդրիխ Մերցը, որը մասնակցել է
եվրոպացի առաջնորդների բանակցություններին Միացյալ Նահանգների և Ուկրաինայի հետ,
հայտարարել է, որ Պուտինի և Զելենսկու հանդիպումը նախատեսված է առաջիկա երկու
շաբաթվա ընթացքում։ Սակայն նա կասկած է հայտնել առ այն, թե Պուտինին «կբավարարի
համարձակությունը» հանդիպելու Զելենսկու հետ։
AFP-ն պնդում է, որ Պուտինը պատրաստ է բանակցել Ուկրաինայի
նախագահի հետ: Axios-ի թղթակից Բարաք Ռավիդը, հղում անելով աղբյուրին, գրել է, որ
Սպիտակ տունը հույս ունի նրանց հանդիպումը անցկացնել մինչև օգոստոսի վերջը:
Զելենսկու խոսքով՝ հենց Ռուսաստանն է առաջարկել Թրամփին նախ
երկկողմ, ապա եռակողմ հանդիպում անցկացնել պետությունների ղեկավարների մակարդակով։
Ուկրաինայի նախագահը հայտարարել է, որ պատրաստ է հանդիպել Պուտինի հետ առանց որևէ նախապայմանի.
«Որովհետև եթե մենք սկսենք պահանջել նախնական հրադադար, Ռուսաստանը կսկսի
առաջադրել հարյուր այլ պայմաններ»։
Կրեմլը հաստատել է Պուտինի և Թրամփի հեռախոսազրույցը,
սակայն չի հաստատել Ռուսաստանի նախագահի պատրաստակամությունը հանդիպելու
Ուկրաինայի առաջնորդի հետ: ՌԴ նախագահի օգնական Յուրի Ուշակովը միայն հայտարարել է,
որ Պուտինը և Թրամփը քննարկել են ռուս-ուկրաինական ուղիղ բանակցությունների
«մակարդակը բարձրացնելու» հնարավորությունը: Պուտինն ավելի վաղ հրաժարվել էր Զելենսկու
հետ անձնական հանդիպումից:
