Սպիտակ տունը X-ի իր օգտահաշվում հրապարակել է ԱՄՆ նախագահ Դոնալդ Թրամփի լուսանկարը Օվալաձև կաբինետում Ռուսաստանի նախագահ Վլադիմիր Պուտինի հետ հեռախոսազրույցի ժամանակ։

Կադրում երևում են նաև պետքարտուղար Մարկո Ռուբիոն և փոխնախագահ Ջեյ Դի Վենսը։ CNN-ը, հղում անելով պաշտոնյաներին, հայտնում է, որ Թրամփի դիմաց նստած է թարգմանիչը՝ նոթատետրով։ Հեռուստաալիքը պարզաբանում է, որ Թրամփը Պուտինի հետ խոսել է բարձրախոսը միացրած։

Հեռախոսազրույցը տեղի է ունեցել Թրամփի՝ Ուկրաինայի նախագահ Վլադիմիր Զելենսկու և եվրոպացի առաջնորդների հետ բանակցությունների օրը, որոնք ժամանել էին Վաշինգտոն։ Հեռախոսազրույցից հետո Թրամփը վերսկսել է նրանց հետ հանդիպումը։

Հեռախոսազանգից հետո Թրամփը հայտարարել է, որ սկսվել են Պուտինի և Զելենսկու հանդիպման նախապատրաստական աշխատանքները, որից հետո կարող են տեղի ունենալ եռակողմ բանակցություններ ԱՄՆ նախագահի մասնակցությամբ։

Կրեմլը հայտնել է, որ Պուտինի և Թրամփի միջև զրույցը տևել է 40 րոպե, ամերիկացի առաջնորդը Ռուսաստանի նախագահին պատմել է Սպիտակ տանը իր հանդիպումների մասին։ Զրուցակիցները կողմ են արտահայտվել ուղիղ բանակցությունների շարունակությանը Ռուսաստանի և Ուկրաինայի պատվիրակությունների միջև և հնարավոր են համարել «ուկրաինական և ռուսական կողմերի ներկայացուցիչների մակարդակի բարձրացում», ասել է Պուտինի օգնական Յուրի Ուշակովը։