Հայաստանի, Ռուսաստանի և Ադրբեջանի փոխվարչապետերն այսօր Մոսկվայում կքննարկեն տրանսպորտային ուղիների վերաբացման հարցը

Այսօր Մոսկվայում մեկնարկելու է Հայաստանի, Ռուսաստանի և Ադրբեջանի փոխվարչապետերի եռակողմ հանձնաժողովի հերթական նիստը, օրակարգում տարածաշրջանում տրանսպորտային ուղիների վերաբացման հարցն է։

Հատկանշական է, որ հանդիպման նախօրեին Ադրբեջանը որոշեց վերադարձնել հայաստանցի ևս հինգ ռազմագերիների։

Հայաստանի արտահանողների միության ղեկավավար Րաֆֆի Մխջյանի խոսքով, անշուշտ, ճանապարհների, հատկապես՝ երկաթուղու վերագործարկումը կարևոր է արտահանումների և ընդհանրապես՝ ողջ տնտեսության համար, սակայն պակաս կարևոր չէ, թե ինչ գնով։

«Ամենանվազագույն բանը՝ էսօր Լարսում, արդեն վերջին 10-15 օրերի ընթացքում, հսկայական կուտակումներ ունենք, և եթե այսօր բացվում է մի ալտերնատիվա Լարսի, ոնց կարող է պատահի՝ մենք չօգտվենք դրանից, 100 տոկոս կօգտվենք, բայց, նորից եմ կրկնում, դա ի՞նչ գնով է լինելու», - ասաց Մխջյանը։

Երեք երկրների փոխվարչապետեր Ալեքսեյ Օվերչուկի, Մհեր Գրիգորյանի և Շահին Մուստաֆաևի հանդիպումների ձևաչափը ստեղծվեց այս հունվարի 11-ին Ռուսաստանի, Հայաստանի ու Ադրբեջանի ղեկավարների պայմանավորվածության արդյունքում։

Աղբյուր՝azatutyun.am