Քաղաքացիակենտրոն
լրատվություն

Ինչու՞ են իրանական և հունական 2 աղբյուրները Սյունիքի դեմ պատերազմ գուժում

Ինչու՞ են իրանական և հունական 2 աղբյուրները Սյունիքի դեմ պատերազմ գուժում
Միջազգային
14:12, 25 март 2021
«Սպուտնիկ Արմենիա» լրատվականը երեկ հղում կատարելով  տելեգրամյան Azariha ալիքին՝ գրել էր․ «Իրանական ԶԼՄ-ները հայտնել են տեխնիկայի կուտակման մասին․ Թուրքիան ձգտում է գրավել Սյունիքը»։  Ընդ որում՝ լրատվականը հղում էր արել միայն այդ տելեգրամյան ալիքին ՝ Azariha-ին, որի տեղադրած հոդվածով չի կիսվել իրանական և ոչ մի ԶԼՄ։

Civic.am-ը տելեգրամյան ակտիվ օգտատերերից կարծիքներ ստանալու և սեփական հետաքննության միջոցով պարզեց, որ Azariha-ն պատկանում է պանիրանիստական ուժերին և որոշակի փոխկապակցվածություն ունի Իրանի հայ համայնքի որոշ ներկայացուցիչների հետ, որոնք ներկայացնում են հայաստանյան ընդդիմադիր կուսակցություններից մեկի սփյուռքի թևը։
ՀՅԴ ԳՄ լրատվականից փորձեցինք ճշտել, թե հնարավո՞ր է խոսքը ՀՅԴ սփյուռքի կառույցներից մեկի մասին է, սակայն ՀՅԴ ԳՄ-ից հերքեցին առնչությունը  Azariha-ին։

Հատկանշանական է, որ մոտ երկու շաբաթ առաջ նոր պատերազմ գուժող մեկ այլ հոդված էլ լույս էր տեսել  հունական Greek City Times լրատվականում։ Այս հոդվածի հեղինակի՝ Պոլ Անտոնոպուլոսի սոցցանցային ակտիվության մոնիտորինգն էլ ակնհայտ է դարձնում, որ վերջինս շրջանառության մեջ է դնում հայաստանյան ընդդիմադիր խմբերի առաջ քաշած թեզերը։
Երկու դեպքերը համադրելով՝ անհնար է չտեսնել օրինաչափությունը, որ թե՛ Հունաստանում, թե՛ Իրանում Սյունիքի վրա հարձակման մասին գրում են այն լրատվականն ու լրագրողը, որոնք առերևույթ փոխկապացվածություն ունեն հայաստանյան ընդդիմադիր շրջանակների հետ։ 

Հատկանշանական է նաև, որ արտերկրյա մամուլի այս թեզերը, որոնք իրենց իսկ երկրներում այլ լրատվականների կողմից չեն հաստատվում, շատ արագ բերվում են հայկական մեդիատիրույթ և տիրաժավորվում։ 

Վստահ ենք՝ որքան մոտենա ընտրության օրը, այդքան նմանատիպ հոդվածները շատանալու են։ Ընդդիմադիր շրջանակները, հասկանանում են, որ Հայաստանի ներսում գործող իրենց մեդիաները արդեն վաղուց սպառել են վստահության ռեսուրսը և անձնական ու այլ կապերի միջոցով փորձելու են գործի դնել այլ երկրների լրատվամիջոցներ՝ որպես նպատակ ունենալով Հայաստանի քաղաքացիների շրջանում վտանգի ու տագնապի զգացողության սերմանումն ու արմատավորումը։