Գերիների վերադարձը ժամերի կամ օրերի հարց է. գործընթացը երկկողմ բանակցության արդյունք է. Խանդանյանը հորդորեց չշրջանառել նրանց անունները՝ մինչև ՀՀ սահմանի հատումը

«Տեղի են ունեցել բանակցություններ ՀՀ վարչապետի աշխատակազմի և Ադրբեջանի նախագահի վարչակազմի միջև, որի արդյունքում (գերիների վերադարձի) այս գործընթացն է տեղի ունեցել»,- լրագրողների հետ ճեպազրույցում ասաց ԱԺ արտաքին հարաբերությունների հարցերով մշտական հանձնաժողովի նախագահ Սարգիս Խանդանյանը և հավելեց, որ հայտարարության մեջ որևէ երրորդ կողմի մասին նշում չկա: 

Սարգիս Խանդանյանը նշեց, որ այս հայտարարությունը շատ կարևոր է, սակայն այն պետք չէ ոչ թերագնահատել, ոչ գերագնահատել:

Լրագրողների հարցին՝ գերիների անունները բարձրաձայնելու վերաբերյալ, Սարգիս Խանդանյանն ասաց, որ ինքը ևս կխուսափի անուններ հնչեցնել. «Շատ զգայուն թեմա է, և մինչև գերիները չհատեն ՀՀ պետական սահմանը, նաև լրատվամիջոցներին խորհուրդ կտայի չշրջանառել գերիների անուններ, որովհետև հասկանում եք, թե ինչքան բարդ կարող է սա լինել գերիների հարազատների համար»:

Իսկ թե երբ կվերադառնան գերիները, պատգամավորի կարծիքով՝ դա պետք է տեղի ունենա շատ մոտակա ժամանակահատվածում. «Գերիների վերադարձը ժամերի կամ օրերի հարց է»: