Արցախի հանրակրթական դպրոցներում իրականացվում է «Ազգային նվագարանները դպրոցում» դաս-համերգների ծրագիր. մեկնարկը տրվել է Բերձորի դպրոցում
Հասարակություն
ԱՀ ԿԳՄՍ նախարարության մշակույթի վարչության ժամանակակից արվեստի և մշակութային կրթության բաժնի կողմից ԱՀ հանրակրթական դպրոցներում կիրականացվի «Ազգային նվագարանները դպրոցում» դաս-համերգների ծրագիր:
Այս մասին «Արցախպրես»-ին տեղեկացրին ԱՀ ԿԳՄՍ նախարարության տեղեկատվության և հասարակայնության հետ կապերի բաժնից:
Ըստ աղբյուրի՝ ծրագրի նպատակն է երեխաններին ծանոթացնել հայկական ազգային նվագարաններին, ինչպես նաև նպաստել նրանց մասնագիտական ընտրությանը:
Ծրագրի շրջանակներում դաս-համերգների միջոցով դպրոցականներին կմատուցվի ազգային երաժշտություն:
Ընթացքում երաժիշտները և երաժշտագետները կներկայացնեն նվագարանը մի քանի նախադասությամբ, կբացատրեն երաժշտական գործիքների նշանակությունը, դրանց պատմությունը:
Ներկայացման հետ միաժամանակ էկրանին կցուցադրվի գործիքը, այնուհետև կհնչի կատարումը տվյալ նվագարանով:
Առանձնապես կարևորվում է ծրագրի իրականացումը սահմանամերձ բնակավայրերում, այդ իսկ պատճառով մեկնարկը տրվել է Բերձորի արվեստի դպրոցից:
Արցախի ազգային նվագարանների պետական նվագախումբն այցելել է Բերձորի արվեստի դպրոց՝ փոքրիկ դաս-համերգի միջոցով սաներին ներկայացրել հայկական ազգային նվագարանները: