ՌԴ Պետդումայի նախագահը Մակրոնին համեմատել է Նապոլեոն Բոնապարտի հետ

Ֆրանսիայի նախագահ Էմանուել Մակրոնը, փորձելով պահպանել իր իշխանությունը, ավելի լավ բան չի մտածել, քան Երրորդ համաշխարհային պատերազմ բորբոքելու փորձն է: Նման կարծիք է հայտնել ՌԴ Պետդումայի նախագահ Վյաչեսլավ Վոլոդինը՝ մեկնաբանելով Ֆրանսիայի նախագահի հայտարարությունները Ուկրաինա արևմտյան երկրների ցամաքային ուժեր հնարավոր ուղարկման վերաբերյալ թեմայի քննարկման մասին։

«Մակրոնը մի շարք ամպագոռգոռ հայտարարություններ է արել, այդ թվում՝ Ուկրաինա ՆԱՏՕ-ի զորքեր ուղարկելու հնարավորության մասին, ինչով սարսափեցրել է իր երկրի բնակիչներին և եվրոպական մի շարք երկրների ղեկավարների: <...> Անձնական իշխանությունը պահպանելու համար Մակրոնը չի մտահղացել որևէ ավելի լավ բան, քան Երրորդ համաշխարհային պատերազմի բորբոքումն է: Նրա նախաձեռնությունները վտանգավոր են դառնում Ֆրանսիայի քաղաքացիների համար»,- նշել է Վոլոդինը Telegram-ի ալիքում։ Նրա խոսքով՝ նույնիսկ Գերմանիայի կանցլեր Օլաֆ Շոլցը, «հիշելով Հիտլերին, ապշել էր նման խելահեղ արկածախնդրությունից»։ 

Պետդումայի խոսնակը Ֆրանսիայի նախագահին նաև համեմատել է Նապոլեոն Բոնապարտի հետ՝ հավելելով, որ «նման հայտարարություններ անելուց առաջ Մակրոնը ճիշտ կանի հիշի, թե դա ինչպես ավարտվեց Նապոլեոնի և նրա զինվորների համար, որոնցից ավելի քան 600 հազարը մնացել էր թաց հողի մեջ պառկած»: «Մակրոնը մոռացել էր, թե ինչպես մի քանի տարի առաջ, համեմատելով ժամանակակից Ֆրանսիան Նապոլեոնի ժամանակների հետ, նա ասաց, որ Բոնապարտը «հաշվի չի առել կորուստները», բայց այդ ժամանակից ի վեր երկիրը «մարդկային կյանքը վեր է դասում ամեն ինչից», - ընդգծել է Վոլոդինը: