Մադրիդի «Ռեալի» գլխավոր մարզիչ Ժոզե Մոուրինյուն կարգապահական խիստ կանոններ է սահմանել մադրիդյան թիմում, հաղորդում է իսպանական AS պարբերականը։
Նշվում է, որ ֆուտբոլիստներին այսուհետ արգելված է ինքնուրույն ընտրել իրենց սննդակարգը. ճաշացանկը կազմելու է բացառապես ակումբի դիետոլոգը՝ նախապես հաստատված սխեմայով։
Բացի այդ, խաղացողները պարտավոր են ակումբի մարզաբազայում լինել պարապմունքի մեկնարկից առնվազն մեկ ժամ առաջ։ Մարզմանն անգամ մեկ րոպե ուշանալու դեպքում ֆուտբոլիստը կհեռացվի ընդհանուր խմբից և անհատական պարապմունք կանցկացնի մարզասրահում։
