Ռուսաստանը պատրաստ է շարունակել խաղաղության բանակցությունները, սակայն դրանց ընթացքում չի դադարեցնի Ուկրաինայում ռազմական գործողությունները։ Այս մասին Նյու Դելիում BRICS-ի գագաթնաժողովի շրջանակում լրագրողներին հայտարարել է ՌԴ արտգործնախարար Սերգեյ Լավրովը։
«Մենք շարունակում ենք պատրաստ լինել բանակցություններին, բայց չենք դադարեցնի հատուկ ռազմական գործողությունը բանակցությունների ընթացքում»,-ասել է Լավրովը։
Նա անդրադարձել է նաև Ուկրաինայի նախագահ Վլադիմիր Զելենսկիին Մոսկվա հրավիրելու Ռուսաստանի առաջարկին՝ այն անվանելով Մոսկվայի կողմից բարի կամքի դրսևորում։ Լավրովը նշել է, որ Զելենսկին դեռ չի վերացրել Վլադիմիր Պուտինի և Ռուսաստանի ղեկավարության հետ շփումների արգելքը։
Սեպտեմբերի 5-ին Ռուսաստանի նախագահը Կրեմլում ընդունել էր հատուկ դեսպանորդ Սթիվ Վիտկոֆին և ԱՄՆ նախագահի փեսային՝ Ջարեդ Քուշներին։ Սա Վաշինգտոնի ներկայացուցիչների ութերորդ այցն էր Ռուսաստան։ Նախագահի օգնական Յուրի Ուշակովի խոսքով՝ Պուտինը նրանց տվել է Հյուսիսարևելյան ռազմական շրջանում տիրող իրավիճակի հստակ և համապարփակ գնահատական, և նրանք խոստացել են հետևել այդ գնահատականներին Կիևի հետ իրենց երկխոսության մեջ։
Հաջորդ օրը երկուսն էլ մեկնել էին Ուկրաինայի մայրաքաղաք, իսկ սեպտեմբերի 8-ին հեռախոսազրույց էր տեղի ունեցել Վլադիմիր Պուտինի և Դոնալդ Թրամփի միջև։
