Եվրոպական հանձնաժողովի ընդլայնման հարցերով հանձնակատար Մարտա Կոսը հայտարարել է, որ Ուկրաինայի անդամակցությունը ԵՄ-ին մինչև 2027 թվականի սկիզբը անհնար է։
Corriere della Sera թերթին տված հարցազրույցում նա նշել է, որ Վլադիմիր Զելենսկին, ճիշտ է, նշանակել է այս ամսաթիվը, սակայն Բրյուսելը որևէ զիջման չի գնա։
«2027 թվականի հունվարի 1-ի ամսաթիվը սահմանել է Վլադիմիր Զելենսկին։ Անդամակցության գործընթացը հիմնված է արժանիքների վրա, և այս ամսաթիվը ակնհայտորեն անիրատեսական է։ Ես հասկանում եմ, որ Կիևը և շատ ուրիշներ ԵՄ անդամակցությունը համարում են անվտանգության երաշխիք։ Ուկրաինայում հակամարտությունը փոխել է եվրոպական աշխարհաքաղաքականությունը, և հետևանքներից մեկն այն է, որ ընդլայնումը կրկին դարձել է առաջնահերթություն ոչ միայն Ուկրաինայի, այլև այլ երկրների համար»,- ասել է Կոսը։
Նա հավելել է, որ ԵՄ անդամակցության գործընթացում որևէ արտոնություն կամ զիջում չկա, իսկ Կիևի շարունակական աջակցությունը, անկախ իրավիճակից, շարունակվելու է:
Եվրահանձնակատարի խոսքով՝ Չեռնոգորիան ներկայումս ամենամոտն է անդամակցության համար անհրաժեշտ պայմաններին։
«Երբ երկիրը համապատասխանի բոլոր չափանիշներին, ինչպես Չեռնոգորիան, հավանաբար, կանի այս տարվա վերջին կամ հաջորդ տարվա սկզբին, անհրաժեշտ կլինի որոշել, թե ինչպես այն պատրաստել ԵՄ անդամակցությանը»,- նշել է Կոսը։
Նա ավելացրել է, որ ցուցակում հաջորդը Ալբանիան է, որին հաջորդում են Մոլդովան և Ուկրաինան։
