Եվրոպական երեք երկրների նախագահները հրաժարվել են համատեղ լուսանկարվել իրենց բելառուս գործընկեր Ալեքսանդր Լուկաշենկոյի հետ ՄԱԿ-ի կլիմայի փոփոխության COP28 համաժողովում։ Այս մասին հայտնում է Delfi գործակալությունը՝ հղում անելով Լիտվայի առաջնորդ Գիտանաս Նաուսեդայի մամուլի ծառայությանը։
Հաղորդագրության մեջ նշվում է, որ Լիտվայի նախագահն ինքը և նրա լատվիացի գործընկեր Էդգարս Ռինկևիչը հրաժարվել են լուսանկարվել։ Բացի այդ, նման որոշում է կայացրել Լեհաստանի առաջնորդ Անջեյ Դուդան։
«Դա կոչվում է ընտանեկան լուսանկար: Լուկաշենկոն չի պատկանում այն ընտանիքին, որին մենք ցանկանում ենք պատկանել»,- Նաուսեդայի մեկնաբանությունը մեջբերում է լրատվական գործակալությունը։
Հանրապետության ղեկավարը նաև հավելել է, որ համաժողովի ժամանակ իր համար «կեղծավորություն կլիներ» կանգնել Բելառուսի ղեկավարի կողքին։
