Ֆրանսիան արգելել է Ռուսաստանի, Բելառուսի և մի շարք այլ երկրների մոտ հարյուր լրագրողների մուտքը Փարիզի ամառային Օլիմպիական խաղերին՝ լրտեսության կասկածանքով։

Ինչպես պարզաբանել է Ֆրանսիայի ներքին գործերի նախարար Ժերալդ Դարմանենը, խոսքը օտարերկրացիների մասին է, ովքեր ցանկանում էին գնալ 2024 թվականի Օլիմպիական խաղերին լրագրողների, ֆիզիոթերապևտների կամ տեխնիկական անձնակազմի անվան տակ և կարող էին կիբերհարձակումներ իրականացնել։ Միաժամանակ Միջազգային օլիմպիական կոմիտեում աշխատող ռուսներին թույլատրվում է ներկա գտնվել խաղերին։

Ընդհանուր առմամբ, նախարարի խոսքով, հատուկ ծառայությունների կողմից ստուգված 960 հազար դեպքերում 4340 մարդ, այդ թվում՝ կամավորներ, մարզադաշտի աշխատողներ և մարզական պատվիրակությունների անդամներ, զրկվել են աշխատանքի թույլտվությունից և 2024 թվականի ամառային օլիմպիական խաղերին մասնակցելու հնարավորությունից։ Խոսքը ենթադրյալ ահաբեկիչների, իսլամիստների, աջ ու ձախ արմատական ​​ակտիվիստների, ինչպես նաև նախկինում հանցագործությունների համար դատապարտվածների մասին է: