ԶՈՒ գլխավոր շտաբի պետի նախկին տեղակալ Ստեփան Ռոբերտի Գալստյանը, նրա կինը՝ Նատալյա Գենադևնա Գալստյանը, ևս մեկ անձ՝  Նասիա Երեմի Գալստյանը, սեպտեմբերի 17-ին պետք է ներկայանան ՀՀ գլխավոր դատախազություն։ Դատախազության ապօրինի ծագում ունեցող գույքի բռնագանձման վարչությունում հիշյալ անձանց պատկանող գույքերի վերաբերյալ կատարվել է ուսումնասիրություն, կազմվել են ամփոփագրեր։ Գալստյանները պետք է դատախազության հիշյալ վարչություն ներկայանան՝ ծանոթանալու գործի նյութերին, ներկայացնելու դիրքորոշում, ինչպես նաև հայտարարագիր։  Նշենք, որ Ազգային անվտանգության ծառայությունը 2021 թ. հոկտեմբերի 2-ին տեղեկացրեց, որ ձերբակալվել է Գլխավոր շտաբի պետի տեղակալ Ստեփան Գալստյանը՝ ՀՀ զինված ուժերի կարիքների համար ռազմամթերքի մատակարարման գործընթացում չարաշահումներ և առանձնապես խոշոր չափերով հափշտակություններ կատարելու դեպքերի առթիվ քննվող քրեական գործի շրջանակում: Գալստյանը «անպիտան հրթիռների» գործով մեղադրյալներից է և կալանքից ազատվել է գրավի դիմաց։

Ստեփան Գալստյանը Զինված ուժերում ծառայել է 1992 թվականից։ ԳՇ պետի տեղակալը նախկինում զբաղեցրել է պաշտպանության նախարարության ավիացիայի պետի, ավիացիոն ջոկատի, զորամասի, ապա բազայի հրամանատարի պաշտոնները։ Իսկ Գլխավոր շտաբի պետի տեղակալ  նշանակվել է 2009 թ. հունվարին:

Նշենք, որ դեռևս 2012 թվականին Hetq.am-ը  գրել էր (https://hetq.am/hy/article/21233), որ ծնունդով մարալիկցի Ստեփան Գալստյանը սեփական ավիաընկերությունն ունի։ 2012 թվականին Կոնգոյի մայրաքաղաք Բրազավիլի «Մայա-Մայա» օդանավակայանի մոտ ինքնաթիռ էր ընկել։ Արդյունքում զոհվել էին անձնակազմի 7 անդամները, որոնցից 5-ը հայեր էին։ Պարզվեց, որ ինքնաթիռը պատկանում էր հայկական «Ռիջ Էյրվեյս» («Ridge Airways») ընկերությանը: Պետռեգիստրի կայքում ընկերության սեփականատեր է նշված Սերգեյ Քոչարովը: Ինքնաթիռը, սակայն, ըստ «Հետքին» նամակ գրած օդաչուի, պատկանում էր ԳՇ պետի տեղակալ, գեներալ-լեյտենանտ Ստեփան Գալստյանին, բայց գրանցված էր նրա կնոջ՝ Նատալյայի անունով: Ավելին, չունենալով շահագործման թույլտվություն, ամիսներ շարունակ ինքնաթիռը ապօրինի է շահագործվել։ ՊՆ-ն հերքել էր  գեներալ Գալստյանի առնչությունն այս ամենին: Գերատեսչության հայտարարության մեջ նշվել էր, թե  նմանատիպ լուրերը զինված ուժերին վարկաբեկելու նպատակ ունեն: «Դժվար է պատկերացնել, որ կառույցը կարող էր հայտարարել, թե, այո, նշված ընկերությունը պատկանում է գեներալին»,- նկատել էր կայքը:

Նատալյա Գալստյանն էլ, ինչպես FIP-ն էր գրել (https://fip.am/17110),  ակտիվ բիզնես գործունեություն է ծավալում, զբաղեցնում է ղեկավար մարմնի պաշտոններ, ունի բաժնեմասեր մի շարք ընկերություններում։  Գալստյանը Գոմքի փոքր հիդրոէլեկտրակայանը (ՓՀԷԿ) շահագործող  «ՆԱՏԷՆԵՐԳՈ 68» ՍՊԸ-ի սեփականատերն է։ ՓՀԷԿ-ը գտնվում է Վայոց ձորի մարզում՝ Զառիթափ համայնքի Գոմք գյուղի վարչական տարածքում: Այն կառուցված է Արփա գետի Կապույտ վտակի վրա։ ՊՆ ավիացիայի նախկին պետի կինը «ՌԻՋ ԷՅՐՎԵՅՍ» ՍՊԸ-ի հիմնադրման օրվանից՝ 2011 թվականից, զբաղեցնում է ընկերության տնօրենի պաշտոնը։ Հենց այս ընկերության օդանավն էր, հիշեցնենք, ընկել Կոնգոյում: Ստեփան Գալստյանի կինը շուրջ մեկ տարի՝ 2011-2012 թվականներին, տնօրեն ու բաժնետեր է եղել նաև «ԷՆԵՐՋԻ ԿՈԿ» ՍՊԸ-ում։ Նշենք, որ «ԷՆԵՐՋԻ ԿՈԿ» ՍՊԸ-ն շահագործում է Տավուշի մարզի Գետահովիտ գյուղում գտնվող «Խաչաղբյուր» փոքր հիդրոէլեկտրակայանը։ 

Գլխավոր շտաբի պետի տեղակալի կինը 50% բաժնեմաս ունի 2014 թվականին հիմնադրված «ՋԻ ԷՄ ԳՐՈՒՊ» ՍՊԸ-ում։ Գալստյանն այս ՍՊԸ-ում զբաղեցնում է նաև տնօրենի պաշտոնը։ «ՋԻ ԷՄ ԳՐՈՒՊ»-ը հիմնադրման օրվանից մինչ օրս Զինծառայողների ապահովագրության հիմնադրամին է վճարել ամսական ընդամենը 1000 դրամ, այսինքն՝ ունեցել է ընդամենը մեկ աշխատակից։

 Հ. Մ.