«Ռուսական կողմը, ի տարբերություն
արևմտյան պսևդոմիջնորդների, Երևանին և Բաքվին չի դրդում խաղաղության պայմանագիր
հապճեպ կնքման»: Այս մասին «ՌԻԱ Նովոստի»-ին ասել է ՌԴ ԱԳ նախարար Սերգեյ Լավրովը։
«Ողջունում ենք զգալի առաջընթացը, որ ձեռք է բերվել ադրբեջանա-հայկական խաղաղության գործընթացի շրջանակներում: Հաշվի առնելով երկար տարիների թշնամանքը, ռազմական գործողությունները և երկու կողմերի զոհերը՝ հասկանում ենք, թե որքան դժվար է Բաքվի և Երևանի համար կարգավորման առաջընթացի հասնելը»,- ասել է ռուս նախարարը։
Այս ամենը պահանջում է ոչ միայն կողմերի զգալի ջանքեր՝ փոխընդունելի լուծումներ գտնելու համար, այլև ժամանակ, նշել է նա։
Լավրովի խոսքով՝ ռուսական կողմը վստահ է,
որ «հապճեպ խաղաղությունը՝ առանց համապարփակ կերպով հաշվի առնելու Բաքվի և Երևանի
դիրքորոշումները, ինչպես նաև «գետնի վրա» իրողությունները, ոչ մի լավ բանի չի
հանգեցնի, ընդհակառակը՝ լարվածության և հակամարտության պոտենցիալ էսկալացիայի լրացուցիչ
ռիսկեր կստեղծի»:
Միևնույն ժամանակ, ՌԴ ԱԳ նախարարի
խոսքով, ԱՄՆ-ի և ԵՄ-ի ձգտումը՝ դուրս մղել Ռուսաստանին հայ-ադրբեջանական
հարաբերությունների կարգավորման գործընթացից, մեծացնում է տարածաշրջանում անվտանգության
սպառնալիքները:
«Կարծում ենք՝ կարևոր է ամրապնդել խաղաղության
գործընթացը տարածաշրջանային պարադիգմայում, բարեկամների՝ Հարավային Կովկասի և
հարակից գործընկեր պետությունների շրջանակում՝ բացառելով ապակառուցողական
միջամտությունը դրսից: Հայ-ադրբեջանական
հարաբերությունների կարգավորման գործընթացից Ռուսաստանին դուրս մղելու Վաշինգտոնի
և Բրյուսելի ձգտումը միայն մեծացնում է տարածաշրջանում անվտանգության
սպառնալիքները»,- ասել է Լավրովը:
Նա հավելել է, որ Ռուսաստանը, ինչպես
նախկինում, պատրաստ է գործընկերային աջակցություն ցուցաբերել Բաքվի և Երևանի միջև
բանակցությունների հաջող ավարտի համար՝ Ռուսաստանի, Ադրբեջանի և Հայաստանի
ղեկավարների միջև 2020-2022 թվականների եռակողմ համաձայնագրերի հիման վրա՝ այն
ձևով և ծավալով, որը պահանջվում է երկու բանակցող կողմերի կողմից:
