Համաշխարհային
առաջնորդներն ու քաղաքական գործիչները շնորհավորանքներ են գրում հանրապետական Դոնալդ Թրամփին, ով հայտարարել է ԱՄՆ նախագահական ընտրություններում իր հաղթանակի մասին։
Նրան արդեն շնորհավորել են Ֆրանսիայի նախագահ Էմանուել Մակրոնը, Հունգարիայի վարչապետ Վիկտոր Օրբանը, Լիտվայի նախագահ Գիտանաս Նաուսեդան, Լատվիայի նախագահ Էդգարս Ռինկևիչը, Ուկրաինայի նախագահ Վլադիմիր Զելենսկին, Իսրայելի վարչապետ Բենիամին Նեթանյահուն, Սերբիայի նախագահ Ալեքսանդր Վուչիչը, Ավստրիայի կանցլեր Կարլ Նեհամերը, ՆԱՏՕ-ի գլխավոր քարտուղար Մարկ Ռյուտեն, Սալվադորի նախագահ Նայիբ Բուկելեն և Իտալիայի փոխվարչապետ Մատեո Սալվինին, ինչի մասին նրանք գրել են սոցիալական ցանցերում։
Մակրոնն իր պատրաստակամությունն է հայտնել աշխատել
հանրապետականների հետ «հանուն
խաղաղության և բարգավաճման»։ Հունգարիայի վարչապետը համոզված է, որ Թրամփի հաղթանակը
«շատ անհրաժեշտ է ողջ աշխարհի համար»։ Նրա խոսքով՝ ամերիկացին
«ամենամեծ ռևանշն է վերցրել ԱՄՆ քաղաքական պատմության մեջ»։ Նեթանյահուն Դոնալդ Թրամփի
վերադարձը Սպիտակ տուն համարել է «պատմական», իսկ Զելենսկին՝ տպավորիչ։ Նա նշել է,
որ «անհամբեր սպասում է ուժեղ Ամերիկայի Միացյալ Նահանգների դարաշրջանին՝ նախագահ
Թրամփի վճռական ղեկավարության ներքո», ինչպես նաև ակնկալում է Ուկրաինային աջակցության շարունակություն։
Ավստրիայի կանցլերը Միացյալ Նահանգներն
անվանել է կարևոր ռազմավարական գործընկեր, նա տրանսատլանտյան հարաբերությունների
հետագա ամրապնդման հույս է հայտնել՝ «գլոբալ խնդիրները միասին հաջողությամբ լուծելու
համար»: Նման հույս է հայտնել Լատվիայի նախագահը։ Վուչիչն ասել է, որ «Սերբիան
հավատարիմ է Միացյալ Նահանգների հետ համագործակցությանը՝ հանուն կայունության,
բարգավաճման և խաղաղության»։ Իտալիայի փոխվարչապետ Մատեո Սալվինին հայտարարել է,
որ կիսում է Դոնալդ Թրամփի՝ անօրինական միգրացիայի դեմ պայքարի և հարկերի իջեցման
ծրագրերը, ինչպես նաև «քրիստոնեական արժեքները և վերադարձը դեպի խաղաղություն,
խոսքի և կարծիքի ազատություն»։
