ԱՄՆ Միջազգային զարգացման գործակալության (USAID) բարեփոխումների առաջին փուլում չեղարկվել է ավելի քան 4100 դրամաշնորհ, ինչը թույլ է տվել խնայել 4,4 միլիարդ դոլար: Արդյունքները հրապարակել է ԱՄՆ Պետդեպարտամենտը, փոխանցում է «Ամերիկայի ձայն»-ը։

15 օրվա ընթացքում Պետդեպարտամենտը գնահատել է ավելի քան 9000 արտաքին դրամաշնորհ՝ կապված օտարերկրյա օգնության տրամադրման հետ, որի ընդհանուր գումարը կազմել է 15.9 միլիարդ դոլարից ավելի:

Նշվում է, որ պահպանվել են պարենային օգնության ֆինանսավորումը, ՄԻԱՎ-ի, տուբերկուլյոզի և մալարիայի բուժման համար դեղերի մատակարարումը։ Բացի դրանից, պահպանվել են օգնության ծրագրերը Լիբանանի, Հաիթիի, Վենեսուելայի, Կուբայի և այլ երկրների համար, որոնք ամերիկյան դրամաշնորհների կենսական կարիքն ունեն։

 ԱՄՆ պետքարտուղար Մարկո Ռուբիոյի գլխավորած 90-օրյա ստուգման ընթացքում ԱՄՆ ՄԶԳ դրամաշնորհների վճարումը դադարեցվել է, բացառությամբ արտակարգ օգնությունների: ԱՄՆ նախագահ Դոնալդ Թրամփը Ռուբիոյին հանձնարարել է համոզվել, որ «հարկատուների դոլարներն օգտագործվում են Ամերիկայի ամրապնդման, անվտանգության ​​բարձրացման և բարգավաճման համար»։

Ստուգման են մնում ավելի քան 6000 երկարաժամկետ դրամաշնորհներ, որոնց ընդհանուր արժեքը կազմում է 58 միլիարդ դոլար: Սպասվում է, որ վերանայման ավարտից հետո օտարերկրյա ծրագրերի ընդհանուր ֆինանսավորման ծավալը կնվազի 92%-ով։

USAID-ն ավելի քան 60 տարի աջակցել է Աֆրիկայում աղքատության, հիվանդությունների, վաղ ամուսնությունների դեմ պայքարի և այլ ծրագրերին: 2020 թվականին՝ COVID-19 համավարակի գագաթնակետին, նույնիսկ Ռուսաստանն է գործակալությունից ստացել թոքերի արհեստական օդափոխության երկու հարյուր սարք. ի դեպ, Ռուսաստանն  իր տարածքում արգելել էր ԱՄՆ ՄԶԳ-ի գործունեությունը դեռևս 2012 թվականին, նշում է BBC-ն։