Ուկրաինական պատվիրակությունը ժամանել է Սաուդյան Արաբիա,
որտեղ այսօր՝ մարտի 11-ին, բանակցություններ են տեղի ունենալու ԱՄՆ ներկայացուցիչների հետ։
«Թիմը տեղում է։ Պատրաստվում ենք աշխատանքի»,- Telegram-ի ալիքում գրել է
Ուկրաինայի նախագահի գրասենյակի ղեկավար Անդրեյ Երմակը, որը գլխավորում է
ուկրաինական պատվիրակությունը։
«Ուկրաինական շահերի պաշտպանություն, պատերազմի ավարտի
հստակ տեսլական, արդյունավետ աշխատանք մեր ամերիկացի գործընկերների հետ»,- նշել է
նա բանակցությունների հիմնական թեմաները։
Բացի Երմակից, ուկրաինական պատվիրակության կազմում են
Ուկրաինայի արտգործնախարար Անդրեյ Սիբիհան, պաշտպանության նախարար Ռուստեմ
Ումերովը և Ուկրաինայի նախագահի գրասենյակի ղեկավարի տեղակալ Պավել Պալիսան, որին
անվանում են Վլադիմիր Զելենսկու ռազմական հարցերով խորհրդական։
Ամերիկյան պատվիրակությունը գլխավորում է պետքարտուղար
Մարկո Ռուբիոն։ Բանակցություններին կմասնակցի նաև Ազգային անվտանգության հարցերով
խորհրդական Մայք Ուոլցը։ Ռուբիոն բանակցությունների նախօրեին հայտարարել է.
«Հուսով եմ, որ վաղը մենք իսկապես լավ հանդիպում կունենանք և շատ շուտով կլինենք
այլ տեղում» (մեջբերումը՝ CNN-ի):
