Ռուսաստանը «զգուշավորությամբ» է արձագանքել 30-օրյա հրադադարի մասին ԱՄՆ-ի
առաջարկին, որը աջակցություն է ստացել Կիևի կողմից, և նշել է, որ Ուկրաինայում
պատերազմի դադարեցման ցանկացած համաձայնություն պետք է հաշվի առնի Ռուսաստանի
հաջողությունները և Մոսկվայի «մտահոգությունները»։ Այս մասին գրում է Reuters-ը՝ հղում
անելով իր ռուսական աղբյուրներին։
Ռուսական բարձրաստիճան աղբյուրներից մեկը Reuters-ին հայտնել է, որ Կրեմլի առաջնորդ Վլադիմիր Պուտինի համար դժվար կլինի համաձայնել զինադադարի գաղափարին՝ առանց պայմանների քննարկման և որոշակի երաշխիքներ ստացման:
«Պուտինի համար դժվար է համաձայնել դրան ներկայիս տեսքով,- ասել է աղբյուրը,
որը ցանկացել է անանուն մնալ՝ իրավիճակի զգայունության պատճառով:- Պուտինն ամուր
դիրքերում է, քանի որ Ռուսաստանը առաջ է գնում»: Գործակալության զրուցակիցը
հավելել է, որ առանց հավելյալ երաշխիքների հրադադարը Ռուսաստանի դիրքերը կարող է
արագ թուլացնել, իսկ Արևմուտքը կարող է պատերազմը դադարեցնելու անկարողության պատասխանատվությունը
դնել Ռուսաստանի վրա։
Ռուսական մեկ
այլ բարձրաստիճան աղբյուր ասել է, որ Մոսկվայի տեսանկյունից հրադադարի առաջարկը
նման է «ծուղակի, քանի որ Պուտինի համար դժվար կլինի դադարեցնել պատերազմն առանց
կոնկրետ երաշխիքների կամ պարտավորությունների»:
Ռուսական երրորդ աղբյուրը նշել է, որ հրադադարի առաջարկն ուղեկցվել է ԱՄՆ
ռազմական օգնության և հետախուզական տվյալների փոխանակման վերականգնմամբ։
Կրեմլը առայժմ պաշտոնապես չի մեկնաբանել իրավիճակը։
