Ռուսաստանի պաշտպանության նախարարությունը հայտնել է, որ
ուկրաինացի զինվորականները «կանխամտածված են պայթեցրել» Կուրսկի մարզում գտնվող «Սուջա»
գազի չափիչ կայանը։
Ռուսական կողմի հայտարարության մեջ ասվում է, որ Ուկրաինան
պայթեցրել է կայանը մարտի լույս 21-ի գիշերը՝ Մոսկվայի ժամանակով ժամը 00:20-ի
սահմաններում։ «Դա արել են Կուրսկի մարզից նահանջող ուկրաինացի զինվորականները»,-
պնդում է ՌԴ ՊՆ-ն։
Գերատեսչությունը
հայտարարել է, որ Կիևն իրականացրել է «կանխամտածված սադրանք… որը պետք է դիտարկել
Ռուսաստանի էներգետիկ ենթակառուցվածքների
վրա վերջին հարվածների շարքում՝ ԱՄՆ նախագահի խաղաղության
նախաձեռնությունները վարկաբեկելու նպատակով»։
Ուկրաինայի Զինված ուժերի գլխավոր շտաբը, իր հերթին, «չհիմնավորված»
է անվանել «Սուջա» կայանի վրա հարձակման մեղադրանքները։ Ուկրաինայի ԶՈՒ-ն պնդում է,
որ ռուսական բանակն ինքն է հրետանային կրակ բացել կայանի ուղղությամբ։ «Ռուսները
շարունակում են բազմաթիվ կեղծիքները և փորձում մոլորեցնել միջազգային հանրությանը:
Խնդրում ենք վստահել միայն պաշտոնական աղբյուրներին, ճշտել տեղեկատվությունը և
չտրվել մանիպուլյացիաներին»,- հայտարարել են Ուկրաինայի Զինված ուժերի գլխավոր
շտաբից։
