ԱՄՆ նախագահ Դոնալդ Թրամփը իր ռուս գործընկեր Վլադիմիր Պուտինին անվանել է
«հաճելի ջենտլմեն»։ Նա այս մասին հայտարարել է Քենեդի կենտրոնում կայացած
հանդիսավոր ընթրիքի ժամանակ։ Հեռարձակման ձայնագրությունը հասանելի է Սպիտակ տան YouTube-ի ալիքում։
«Ինչո՞ւ չնստենք և չպատմենք միմյանց, թե ինչպես է անցել օրը։ Գուցե նախ պետք է ես սկսեմ Վլադիմիր Պուտին անունով մի հաճելի ջենտլմենի հետ իմ փոքրիկ զրույցից»,- ողջունել է Սպիտակ տան ղեկավարը միջոցառման հյուրերին։
Թրամփը հավելել է, որ լավ զրույց է ունեցել Ռուսաստանի նախագահի հետ, և
«որոշակի առաջընթաց կա»։
Հիշեցնենք, որ մայիսի 19-ին Ռուսաստանի և Միացյալ Նահանգների նախագահների միջև
տեղի է ունեցել երկժամյա հեռախոսազրույց, որի ընթացքում բարձրացվել է
ռուս-ուկրաինական պատերազմի հրադադարի հարցը։ Թրամփը զրույցը որակել է «շատ լավ» և
ասել, որ Ռուսաստանը և Ուկրաինան «անհապաղ» կսկսեն հրադադարի վերաբերյալ
բանակցությունները։
