Խորհրդային Միության փլուզման ժամանակ «խախտվել է իրավական ընթացակարգը», իսկ դա նշանակում է, որ ԽՍՀՄ-ը «դեռևս գոյություն ունի», հայտարարել է Ռուսաստանի նախագահի խորհրդական Անտոն Կոբյակովը Սանկտ Պետերբուրգի միջազգային իրավական ֆորումի եզրափակիչ մամուլի ասուլիսում։ Նրա խոսքով՝ սա թույլ է տալիս ասելու, որ Ուկրաինայում պատերազմը «ներքին գործընթաց» է։

Կոբյակովի խոսքով՝ ԽՍՀՄ-ը ստեղծվել է Ժողովրդական պատգամավորների համագումարի որոշմամբ, հետևաբար այն պետք է լուծարվեր նույն մարմնի որոշմամբ։ Բացի դրանից, նրա խոսքով, Միութենական հանրապետությունների Գերագույն խորհուրդները լիազորություններ չունեին վավերացնելու Բելովեժյան համաձայնագիրը։

«Իսկ եթե իրավական ընթացակարգը խախտվել է, ապա ստացվում է, որ իրավականորեն ԽՍՀՄ-ը գոյություն ունի։ Սա են ասում սահմանադրական իրավունքի մասնագետները։ Բայց եթե ԽՍՀՄ-ը չի լուծարվել, ապա տրամաբանորեն, իրավական տեսանկյունից, ուկրաինական ճգնաժամը ներքին գործընթաց է»,- ասել է Պուտինի խորհրդականը։

Կոբյակովը հավելել է, որ «ԽՍՀՄ փլուզումը պետք է իրավական գնահատական ​​ստանա սահմանադրական իրավունքի մասնագետների կողմից»։ Նման գնահատականը, նրա խոսքով, «կօգնի հասկանալ այսօրվա իրադարձությունները»։ Նա հավելել է, որ ֆորումի շնորհիվ «այս իրավիճակի քննարկումն» արդեն սկսված է։