Բելառուսի արտգործնախարար Մաքսիմ Ռիժենկովը հայտարարել է, որ ՀՀ վարչապետ Նիկոլ Փաշինյանը ԵԱՏՄ համաժողովին կմասնակցի տեսակապով։

Նա նաև ընդգծել է, որ համաժողովի ընթացքում լիագումար նստաշրջան է նախատեսված՝ Բելառուսի պետության ղեկավարի և արտասահմանյան պատվիրակությունների ղեկավարների մասնակցությամբ. «ԵԱՏՄ անդամ բոլոր պետությունների ղեկավարները (Ռուսաստան, Ղազախստան, Ղրղզստան), բացառությամբ ՀՀ վարչապետի, հաստատել են իրենց անձնական ներկայությունը։ Նիկոլ Փաշինյանը ֆորումին կմասնակցի հեռակա ձևաչափով՝ տեսակապով»։

Նա նաև հույս է հայտնել, որ պաշտոնական այցով միջոցառմանը կմասնակցի նաև Իրանի նախագահը: «Թեև հասկանում ենք տարածաշրջանում ստեղծված իրավիճակը, ցանկանում ենք շուտափույթ կարգավորում, խաղաղության հաստատում»,- ասել է Ռիժենկովը։

Համաժողովին իրենց մասնակցությունն են նախատեսում ունենալ նաև Մոնղոլիայի, ԱՄԷ-ի, Նիկարագուայի և Մյանմայի պատվիրակությունները: Վերջինը ներկայացված կլինի վարչապետ Մին Աուն Խլայնի մակարդակով։

Հիշեցնենք, որ ավելի վաղ ՀՀ վարչապետ Նիկոլ Փաշինյանը հայտարարել էր, որ քանի դեռ Բելառուսի նախագահն է Ալեքսանդր Լուկաշենկոն, ինքը Բելառուս չի գնա։ ԵԱՏՄ նախորդ նիստին, որը կայացավ դեկտեմբերին Սանկտ Պետերբուրգում, Փաշինյանը ևս մասնակցեց տեսակապով՝ այդ անգամ ևս վերահաստատելով Բելառուս չգնալու իր դիրքորոշումը։