Իսրայելական բանակը այսօր՝ հունիսի 20-ի առավոտյան հայտարարել է, որ գիշերվա ընթացքում իր ինքնաթիռները հարվածել են Թեհրանում հրթիռների արտադրության ձեռնարկություններին ու միջուկային հետազոտությունների կենտրոնին և Իրանի այլ վայրերի:

Իսրայելի պաշտպանության բանակի մամուլի ծառայության գրասենյակի հաշվետվության համաձայն՝ հարվածներին մասնակցել է 60 ինքնաթիռ: «Թիրախների թվում են եղել ռազմարդյունաբերական տարածքները, որտեղ արտադրվում են հրթիռային բաղադրիչներ, ինչպես նաև հրթիռային շարժիչի մասերի ձուլման համար հումքի արտադրությունը»,- հաղորդում է Times of Israel-ը:

Բացի դրանից, իսրայելցի զինվորականները հայտարարել են, որ կրկին հարված են հասցրել Պաշտպանության նորարարությունների և հետազոտությունների կազմակերպության (SPND) գլխավոր գրասենյակին: «SPND-ը ծառայում է որպես իրանական ռազմական մեքենայի համար առաջադեմ տեխնոլոգիաների և զենքի հետազոտությունների ու մշակման կենտրոն: Այն հիմնադրվել է 2011 թվականին Իրանի միջուկային զենքի ստեղծման ծրագրի հիմնադիր Մոհսեն Ֆահրիզադեի կողմից»,- ասվում է տեղեկագրում:

 Իսրայելցի զինվորականները հայտնել են մեկ այլ անանուն արդյունաբերական օբյեկտի հարվածելու մասին, որը, ինչպես պնդում են նրանք, արտադրում էր «միջուկային ծրագրի համար կարևոր բաղադրիչներ»։