«Ռուբեն Վարդանյանին գործուղել էին էնտեղ՝ սառեցնելու իրավիճակը, որը Ադրբեջանը թույլ չէր տա»․ Սամվել Բաբայան

Այսօր Հանրային հեռուստաընկերությանը տված հարցազրույցում Արցախի ՊԲ նախկին ղեկավար Սամվել Բաբայանը պատասխանելով հարցին, թե եթե Արցախի նոր իշխանություններին բերել է Ռուսաստանը, ինչո՞ւ թույլ տվեց, որ հարձակվեն Արցախի վրա, ասաց․ «Պրոբլեմն այն է, որ դուք համարում եք, որ Ռուսաստանը կարող է թույլ տալ կամ թույլ չտալ Ադրբեջանին։ Ճիշտ հակառակը, Ադրբեջանը ինչ արել է մեր դեմ, արել է, որ Ռուսաստանից ձերբազատվի, հեղինակազրկի, բացատրի, որ Ռուսաստանն իրենից ոչինչ չի ներկայացնում, և դա իրականություն է։ Ես դրա համար պարզ բացատրել եմ՝ ուղիղ բանակություններ, առանց որիևիցե միջնորդության, առանց միջնորդի»։  

Ինչ վերաբերում է Արցախում Ռուբեն Վարդանյանի առաքելությանը՝ Սամվել Բաբյանն ասաց, որ Ռուբեն Վարդանյանը եկել, դարձել է պետնախարար, և դրանից էլ սկսվել է բլոկադան։ «Նրան գործուղել էին էնտեղ՝ սառեցնելու իրավիճակը, որը Ադրբեջանը թույլ չէր տա, որևիցե ձևով թույլ չէր տա։ Էս մեկին էլ, որ փոխել են, դրել, համարել են, որ եկել է իրավիճակը սառեցնելու։ Ուզում են սառեցնել, Ադրբեջանը չի գնա դրան։ Ինքը հասկանում էր, որ պետք ա արագ, էս 2 տարում հարցերը լուծեր, հակառակ դեպքում՝ պրոբլեմ է ունենալու»։