Տաթև-Լծեն ճանապարհը կշահագործվի տարեվերջին, կլուծվի կցորդիչով բեռնատարների՝ Տաթևի ոլորաններն անցնելու խնդիրը. Գնել Սանոսյան

Իրանից Հայաստան եկող և Հայաստանից Իրան գնացող բեռնատարները շուրջ մեկ տարի է՝ օգտվում են Տաթև-Աղվանի այլընտրանքային ճանապարհից՝ շրջանցելով Գորիս-Կապան ճանապարհի այն հատվածը, որտեղ տեղակայված են ադրբեջանական անցակետերը։ Այս մասին Civic.am-ի հետ զրույցում ասաց ՀՀ տարածքային կառավարման և ենթակառուցվածքների նախարար Գնել Սանոսյանը։ 

Նա ընդգծեց, որ իրանցի վարորդները դեռևս Տաթև-Աղվանի ճանապարհի կառուցման ընթացքում էին երբեմն օգտվում այդ ճանապարհից, և ճանապարհաշինարարական աշխատանքները որքան ավարտին են մոտեցել, այնքան օգտվելու ցուցանիշը բարձրացել է: «Հիմա հատուկենտ մեքենաներ են մյուս ճանապարհով անցնում, հիմնականում Տաթև-Աղվանի ճանապարհով են երթևեկում»,- հավելեց Գնել Սանոսյանը։ 

Ինչ վերաբերում է կցորդիչով բեռնատարների համար դժվարանցանելի համարվող Տաթև-Աղվանի ճանապարհի ոլորաններին, ՏԿԵ նախարարը շեշտեց, որ ճանապարհի այն դժվարությունները, որոնք ոլորանների նեղ լինելու հետ են կապված, այդ խնդիրը կվերանա, երբ Վերին Խոտանանը շրջանցող ճանապարհը կառուցեն ու ավարտեն, ինչպես նաև Տաթև-Լծեն ճանապարհը։ 

Հարցին՝ ե՞րբ են ճանապարհները հանձնվելու շահագործման, Գնել Սանոսյանն արձագանքեց՝ տարեվերջին։ 

Նշենք, որ նախորդ տարի՝ 2021թ. աշնանը ՀՀ ԱԱԾ-ն տեղեկացրեց, որ Ադրբեջանը Գորիս-Կապան, Գորիս-Ճակատեն ճանապարհների՝ իր վերահսկողության տակ գտնվող տարածքներում կտեղակայի անցակետեր՝ սահմանային և մաքսային հսկողություն իրականացնելու նպատակով։ Անցակետերը տեղակայելուց հետո ադրբեջանական կողմը Իրանից Հայաստան եկող բեռնատարների վարորդներից գումար էր գանձում, որպես մաքսատուրք 260 դոլար՝ 130 դոլարը՝ ՀՀ ապրանք բերելու, իսկ մյուս 130 դոլարը՝ Իրան վերադառնալու համար:

Նարա Մարտիրոսյան