Պուտինը չի մեկնի ՀԱՀ՝ ԲՐԻԿՍ-ի գագաթնաժողովին. նրա փոխարեն ռուսական պատվիրակությունը կգլխավորի Լավրովը

Ռուսաստանի նախագահ Վլադիմիր Պուտինը չի մեկնի Հարավաֆրիկյան Հանրապետություն՝ ԲՐԻԿՍ-ի գագաթնաժողովին, հայտարարել է ՀԱՀ նախագահի վարչակազմը։ Ռուսական պատվիրակությունը կգլխավորի արտգործնախարար Սերգեյ Լավրովը։

Որոշումը, որ Պուտինը չի մեկնի Հարավային Աֆրիկա, ասվում է հայտարարության մեջ, որն ընդունվել է ռուսական կողմի հետ «փոխադարձ համաձայնությամբ»։

ՀԱՀ-ը վավերացրել է Հռոմի ստատուտը, ուստի իրավաբանորեն պարտավոր է Միջազգային քրեական դատարանի օրդերով կալանավորել Պուտինին և հանձնել նրան Հաագային։ Միևնույն ժամանակ Հարավային Աֆրիկայի Հանրապետության նախագահ Սիրիլ Ռամաֆոսան, պատասխանելով ՄՔԴ-ի նկատմամբ պարտավորությունները կատարելու ընդդիմության պահանջին, հայտարարել է, որ Ռուսաստանը զգուշացրել է, որ Պուտինի կալանավորումը կգնահատվի որպես պատերազմի հայտարարություն։

Ռուսաստանի Դաշնության նախագահի մամուլի քարտուղար Դմիտրի Պեսկովն իր հերթին հայտնել է, որ Ռուսաստանը որևէ սպառնալիք չի հնչեցրել Հարավաֆրիկյան Հանրապետության իշխանությունների հասցեին՝ կապված Ռուսաստանի նախագահի հնարավոր կալանավորման հետ ԲՐԻԿՍ-ի գագաթնաժողովին նրա մասնակցության ընթացքում, սակայն նախազգուշացրել է հնարավոր հետևանքների մասին։ 

«Ոչ ոք ոչ մեկին ոչինչ չի հասկացրել։ Այս աշխարհում բոլորի համար բացարձակապես պարզ է, թե ինչ է նշանակում ոտնձգության փորձ ռուսական պետության ղեկավարի դեմ,- Պեսկովի խոսքերն է մեջբերում «Ինտերֆաքսը»։- Հետևաբար այստեղ որևէ մեկին որևէ բան բացատրելու կարիք չկա»։