«Համշեն տուր» ընկերության հիմնադիր-տնօրեն Գևորգ Պետրոսյանը գրառում է կատարել

«Համշեն տուր» ընկերության հիմնադիր-տնօրեն Գևորգ Պետրոսյանը ցավակցություն է հայտնել Շիրակի մարզում երեկ տեղի ունեցած ողբերգական վթարի հետևանքով զոհվածների ընտանիքներին ու ընկերներին։

Նրա գրառումը ներկայացնում ենք ստորև.

«Այս ամենն աննկարագրելի չափի ողբերգություն է, չգիտես էլ, թե ինչ խոսել, ինչ ասել։

Այս ողբերգության պատճառով կորցրել եմ նաև իմ լավ ընկերներին․ տարիներով հազարավոր կիլոմետրեր կտրած իմ շատ սիրելի ընկեր Մառլենին և մեզ հետ իր նոր ճանապարհը սկսած, անչափ լուսավոր, պայծառ, խելացի Մուշեղին, որի հետ էլ երկար ճանապարհ պիտի անցնեինք։ Շատերդ գիտեիք Մառլենին որպես վարորդ, որ մեզ հասցնում էր մեր սիրելի վայրեր, իսկ Մուշեղին մեկ անգամ տեսածներն էլ հասցրել են սիրել իրեն։ Ցավն աննկարագրելի չափի է ու գնալով միայն խորանում է։

Բոլորին համբերություն ու չգիտեմ, թե ինչ չափի ուժ։ Ավել բան այս պահին չեմ կարող գրել կամ ասել։

Շնորհակալ եմ նաև բոլոր նրանց, ովքեր այս ծանրագույն պահին մեր և զոհվածների ընտանիքների կողքին են»։