ԱՀԿ-ի փոխանցմամբ՝ «օմիկրոն» շտամի հետևանքով մահվան դեպքեր դեռ չեն գրանցվել

Առողջապահության համաշխարհային կազմակերպությունը դեռևս տեղեկություն չունի կորոնավիրուսի «օմիկրոն» շտամի հետևանքով արձանագրված մահվան դեպքերի մասին:

«ՌԻԱ Նովոստի»-ի փոխանցմամբ՝ այս մասին ճեպազրույցի ժամանակ հայտնել է ԱՀԿ պաշտոնական ներկայացուցիչ Քրիստիան Լինդմայերը:

«Ես դեռ չեմ տեսել արձանագրություններ մահվան դեպքերի մասին, որոնք կապված կլինեն «օմիկրոն» հիմնամանրէի հետ: Բայց մենք վկայություններ ենք հավաքում, և դրանք ավելի շատ կլինեն, քանի որ շատ երկրներ են թեստավորում մարդկանց և հետևում վիրուսի տարածմանը: Այնպես որ մենք ավելի շատ տեղեկություն կլինի, բայց հուսով եմ՝ ոչ մահեր»,- ասել է ԱՀԿ ներկայացուցիչը:

Նրա խոսքով՝ վիրուսի նոր տեսակի մասին առավել հստակ տեղեկություններ ի հայտ կգան մի քանի շաբաթից: