Ի՞նչ է կատարվում Էկվադորում. դիմակավորված անձանց ներխուժում հեռուստաալիքի ստուդիա, գնդակահարություններ փողոցներում, ոստիկանության աշխատակիցների առևանգում

Անհայտ դիմակավորված անձինք սառը զենքերով ներխուժել են Էկվադորի Գուայաքիլի TC հեռուստաալիքի ստուդիա, որտեղ շարունակվում են անկարգությունները՝ կապված երկրի բանտերի վերակազմավորման հետ։ Տեղի ունեցածի կադրերը հրապարակել է Canal 7 հեռուստաընկերությունը։

«Կապյուշոններով զինված անձինք մտել են Գուայաքիլի TC տարածք»,- ասվում է հեռուստաալիքի բլոգի հաղորդագրության մեջ: 
Հաղորդվում է նաև, որ կարտելի անդամները փողոցում գնդակահարել են աշակերտուհու, սպանվել են նաև Գուայաքիլի համալսարանի 50 ուսանողներ:

Զինված կարտելները Էկվադորի փողոցներում սկսել են զանգվածաբար պայթեցնել և գնդակահարել ոստիկաններին։
Փողոցներում ռազմական տեխնիկա է հայտնվել:
 
Նախօրեին նախագահ Դանիել Նոբոան բանտերում մի շարք անկարգություններից և ամենամեծ հանցախմբի ղեկավարի փախուստից հետո 60 օրով արտակարգ դրություն է սահմանել, որպեսզի գործի դնի զինված ուժերը քրեակատարողական համակարգի նկատմամբ վերահսկողությունը վերականգնելու համար։

Էկվադորի կառավարության գործողությունները անկարգությունների ալիք են առաջացրել երկրի քաղաքներում. երեքշաբթի գիշերը հանցագործները սկսել են այրել մեքենաներ և ավտոբուսներ, իսկ Գուայաքիլում գրանցվել են ինքնաշեն պայթուցիկ սարքերի պայթյուններ։ Էկվադորի ոստիկանությունը հայտնել է, որ անհայտ անձինք մեկ օրից պակաս ժամանակում առևանգել են ոստիկանության յոթ աշխատակցի Կիտոյում և երկրի հարավ-արևմուտքում գտնվող Մաչալա քաղաքում։ 

Իշխանությունները Էկվադորի մայրաքաղաք Կիտոյում անկարգություններից հետո ուժեղացրել են անվտանգության միջոցառումները և երկրի կառավարությանը կոչ են արել ներգրավել բանակը ռազմավարական օբյեկտները պաշտպանելու համար: