«ԼՂ նախադպրոցական հաստատությունների շուրջ 6000 սաներ, հանրակրթական դպրոցների շուրջ 19 հազար աշակերտներ, բուհերի շուրջ 6.800 ուսանողներ արդեն մեկ ամիս զրկված են 21-րդ դարի ամենակենսական իրավունքներից մեկից՝ կրթության իրավունքից, որովհետև արդեն 1 ամիս ԼՂ մանկապարտեզները, դպրոցները, բուհերը փակ են»,- այսօր՝ հունվարի 26-ին, Կառավարության հերթական նիստում հայտնեց վարչապետ Նիկոլ Փաշինյանը:

Նրա խոսքով՝ նման դեպք տեղի էր ունեցել միայն 44-օրյա պատերազմի և կորոնավիրուսի ժամանակ:

«Չբավարարվելով Լաչինի միջանցքը փակելով՝ Ադրբեջանը փակում է նաև Լեռնային Ղարաբաղը սնուցող գազի խողովակը, հետո բացում 10 տոկոսով, հետո նորից փակում, հետո նորից բացում, ասենք, 25 տոկոսով, և այսպես շարունակ»,- նշեց վարչապետը և հավելեց, որ Ադրբեջանն, այսպիսով, կիրառում է նաև գազային ճնշման գործիքը, ինչը դատապարտելի է:

Նա նշեց, որ մանկապարտեզները չեն աշխատում նաև Լաչինի միջանցքի փակման հետևանքով սննդի բացակության պատճառով. «Արդեն 46 օր ԼՂ բնականոն կյանքը խաթարված է, և հումանիտար ճգնաժամը ծավալվում է ամբողջ թափով: Ադրբեջանը խափանել է նաև ԼՂ-ն հոսանքով ապահովող գծերի աշխատանքը, ուստի ԼՂ-ում հովհարային անջատումներ են: Բնակչությանը առաջին անհրաժեշտության ապրանքներ մատակարարվում են կտրոնային համակարգով»: