Այսօր ՄԱԿ-ի Անվտանգության խորհուրդը կքննարկի Կիևի մանկական հիվանդանոցին ռուսական հարվածների հետևանքները։ Այս մասին Reuters-ին հայտնել են դիվանագիտական ​​աղբյուրները։

Ռուսաստանը երեկ՝ հուլիսի 8-ին, հրթիռային հարված է հասցրել Կիևի մանկական հիվանդանոցին և նմանատիպ հարվածների ենթարկել Ուկրաինայի այլ քաղաքներ:

Ուկրաինայում խաղաղ բնակչությանը հասցված զանգվածային հրթիռային հարվածի հետևանքով զոհվածների թիվը հասել է 37-ի, հայտարարել է Ուկրաինայի նախագահ Վլադիմիր Զելենսկին։ Զոհերի թվում են երեք երեխաներ: Եվս 170 մարդ, այդ թվում՝ 13 երեխա, ստացել է վիրավորում։ «Ընդհանուր առմամբ վնասվել է գրեթե 100 օբյեկտ՝ մանկական հիվանդանոց, սովորական տներ, մանկապարտեզներ, ծննդատուն, քոլեջ, բիզնես կենտրոն։ Տեղում շարունակվում է փլատակների մաքրումը»,- ասել է Ուկրաինայի նախագահը։

ՄԱԿ-ի գլխավոր քարտուղար Անտոնիո Գուտերեշը խստորեն դատապարտել է ռուսական հարվածները։ Նա հրթիռային հարվածները մանկական հիվանդանոցի և ևս մեկ առողջապահական օբյեկտի ուղղությամբ անվանել է «հատկապես ցնցող»: Այս մասին հայտարարել է Ստեֆան Դյուժարիկը:

«Քաղաքացիների և քաղաքացիական օբյեկտների ուղղությամբ հարվածներն արգելված են միջազգային մարդասիրական իրավունքով։ Ցանկացած նման հարձակում անընդունելի է և պետք է անհապաղ դադարեցվի»,- հայտարարել է Գուտերեշի ներկայացուցիչը։

Անվտանգության խորհրդի նիստը գումարվում է Մեծ Բրիտանիայի, Ֆրանսիայի, Էկվադորի, Սլովենիայի և ԱՄՆ-ի պահանջով։