Բաքուն կրկին ջղաձգվել է Ֆրանսիայի նախագահ Էմանուել Մակրոնի՝ Ադրբեջանի մասին հայտարարություններից, որը Ֆրանսիայի նախագահը հնչեցրել է Մեծ Բրիտանիայում Եվրոպական քաղաքական համայնքի գագաթնաժողովի շրջանակներում մամուլի ասուլիսին։

Ադրբեջանի ԱԳՆ մեկնաբանության մեջ, մասնավորապես, ափսոսանք է արտահայտվում, որ «Ֆրանսիայի նախագահ Էմանուել Մակրոնը արդարացնում է Հայաստանի ռազմականացման քաղաքականությունը և դրսևորում բացահայտ կողմնակալ դիրքորոշում Ադրբեջանի նկատմամբ, ինչը տարածաշրջանում լարվածություն ստեղծելու և խաղաղության գործընթացին խոչընդոտելու Ֆրանսիայի փորձերի ևս մեկ վառ օրինակ է»։

Ադրբեջանը ֆրանսիական կողմին «հիշեցնում» է, որ «պատերազմը վարել են Ադրբեջանի ինքնիշխան տարածքում, որպեսզի վերջ դնեն Հայաստանի 30-ամյա օկուպացիային, և դա միջազգային իրավունքի շրջանակներում եղել է մեր երկրի օրինական իրավունքը: Ադրբեջանի ցանկացած ջանք, այդ թվում՝ իր ռազմական ներուժի հզորացումը, ուղղված է եղել և ուղղված է արդարացի նպատակին։ Սակայն դա չի կարելի ասել Հայաստանի մասին, որը օկուպացիոն պետություն է»:

 «Ուզում ենք նաև հիշեցնել, որ Ֆրանսիայի նման պետությունների քաղաքականությունն էր, որ չնպաստեց հակամարտության խաղաղ կարգավորմանը, թույլ չտվեց դադարեցնել Հայաստանի կողմից ադրբեջանական տարածքների օկուպացումը, որ գրեթե 30 տարի կոծկեց Հայաստանի ագրեսիան: Հաշվի առնելով վերը նշվածը՝ մենք ևս մեկ անգամ հայտարարում ենք, որ Ֆրանսիայի ջանքերը, որոնք չեն ծառայում խաղաղությանը և խաթարում են տարածաշրջանում կայունությունը, որևէ արդյունքի չեն տա»,- ասված է Ադրբեջանի ԱԳՆ-ի մեկնաբանության մեջ։