ԱՄՆ նախագահ Ջո Բայդենի դուրս գալը նախագահական ընտրապայքարից դարձել է ժամանակի հարց՝ պետության ղեկավարին իր կուսակիցների և հովանավորների կողմից աջակցության կորստի ֆոնին։ Այսպիսի պնդմամբ է հանդես եկել The Wall Street Journal-ը (WSJ)՝ հղում անելով բարձրաստիճան դեմոկրատներին մոտ կանգնած անանուն աղբյուրներին։

Նրանց տեղեկություններով՝ կորոնավիրուսով վարակված Բայդենի արտաքին տեսքը, ինչպես նաև մի շարք վրիպումներ, որոնք նա թույլ է տվել վերջին հարցազրույցներում, դեմոկրատների մտավախությունն են առաջացրել առ այն, թե նա արդյոք ի վիճակի՞ է մասնակցելու նախընտրական արշավին և մնալու Սպիտակ տանը երկրորդ ժամկետում:

Պարբերականի աղբյուրները նշում են, որ ներկայիս իրավիճակում նախագահի կուսակիցները նրա դուրս գալը նախագահական ընտրապայքարից համարում են միայն ժամանակի հարց և արդեն ակտիվորեն ծրագրում են իրենց հաջորդ քայլերն այն բանից հետո, երբ նա կհրաժարվի առաջիկա ընտրություններին մասնակցությունից։

Նրանց տեղեկություններով՝ հուլիսի 17-ին Նյու Յորքում կայացել է դեմոկրատների ​​խոշոր հովանավորների հանդիպում, որի ժամանակ նրանք քննարկել են այդ կուսակցության նախընտրական արշավի ֆինանսավորումը դադարեցնելու հարցը, քանի դեռ Բայդենը չի լքել ընտրապայքարը։  

Սպիտակ տանը WSJ-ի աղբյուրները պնդում են, որ իրենք շարունակում են անտեղյակ լինել Բայդենի ծրագրերից, քանի որ պետության ղեկավարի մերձավոր շրջանակը վերջին ժամանակներս նեղացել է: Նրանցից ոմանք, սակայն, նշում են, որ «Բայդենի իշխանությունը թուլացել է», և տեղի ունեցողը բնութագրել են որպես «վերընտրվելու համար նրա պայքարի ավարտի սկիզբ»։

«Ճնշումը (Բայդենի վրա) անհաղթահարելի է»,- մեջբերում է բրիտանական The Financial Times (FT) թերթը անանուն բարձրաստիճան դեմոկրատի խոսքերը: Նրա գնահատականներով՝ Բայդենը կարող է լքել նախագահական ընտրապայքարը «արդեն երկուշաբթի (հուլիսի 22-ին)»։ Պարբերականի այլ աղբյուրներ կարծում են, որ նախագահը կարող է հրաժարվել նախընտրական արշավին մասնակցությունից նույնիսկ ավելի վաղ։