Իրանը ոչ մեկից թույլտվություն չի խնդրելու ինքնիշխանությունը պաշտպանելու իր իրավունքից օգտվելու համար։ Այս մասին հայտարարել է Իրանի ԱԳՆ պաշտոնական ներկայացուցիչ Նասեր Քանանին։
Երկուշաբթի օրը Բրիտանիան, Գերմանիան և Ֆրանսիան հանդես են
եկել համատեղ հայտարարությամբ՝ կոչ անելով Իրանին և նրա դաշնակիցներին «ձեռնպահ մնալ հարձակումներից, որոնք կարող են ավելի մեծացնել տարածաշրջանային լարվածությունը և սպառնալիքի տակ դնել հրադադարի և պատանդների ազատ արձակման շուրջ բանակցությունների հնարավորությունը»:
«Իսլամական
Հանրապետությունը վճռական է տրամադրված պաշտպանելու ինքնիշխանությունը և ազգային
անվտանգությունը, նպաստելու տարածաշրջանային կայունությանը և տարածաշրջանում
զսպելու ահաբեկչության ու անկայունության իրական աղբյուրին, և ոչ մեկից
թույլտվություն չի խնդրելու իր անքակտելի իրավունքներն իրագործելու համար»,- ասել
է Քանանին:
Նրա խոսքով՝ եվրոպական եռյակը «սիոնիստական ռեժիմի միջազգային հանցագործությունների վերաբերյալ ոչ մի կաթիլ առարկություն չպարունակող հայտարարության մեջ Իրանից պահանջում է պատասխան միջոցներ չձեռնարկել իր
ինքնիշխանությունն ու տարածքային ամբողջականությունը խախտող ռեժիմի դեմ»։
«Եթե այդ երկրներն
իսկապես ձգտում են տարածաշրջանում խաղաղության և կայունության, նրանք պետք է առանց
որևէ վերապահումների հանդես գան Իսրայելի ռեժիմի սադրանքների և
հակամարտությունների բորբոքման դեմ, ինչպես նաև կոչ անեն անհապաղ ավարտել
պատերազմը Գազայի հատվածի դեմ և վերջ տալ կանանց, երեխաների և Պաղեստինի անպաշտպան
բնակիչների սարսափելի սպանություններին»,- հայտարարել է իրանցի դիվանագետը։
