«Ադրբեջանն ու Ուզբեկստանն այսօր պաշտոնապես դարձան դաշնակիցներ: Տարածաշրջանում դրական գործընթացները մեծապես կախված են Ուզբեկստանի և Ադրբեջանի միջև արդյունավետ համագործակցությունից»։ Այս մասին մամուլին հայտարարել է Ադրբեջանի նախագահ Իլհամ Ալիևը Ուզբեկստանի նախագահ Շավքաթ Միրզիյոևի հետ բանակցությունների արդյունքներով:

«Այսօր Կենտրոնական Ասիայի, Հարավային Կովկասի և Կասպից ծովի տարածաշրջանը վերածվում է միասնական աշխարհաքաղաքական տարածաշրջանի, և Ուզբեկստանի ու Ադրբեջանի արդյունավետ համագործակցությունից են մեծապես կախված մեր տարածաշրջաններում դրական գործընթացները»,- նշել է Ալիևը։

Շավքաթ Միրզիյոևն էլ իր ելույթում նշել է, որ Ուզբեկստանը ոչ մի երկրի հետ այսքան կարճ ժամանակաընթացքում դեռ չի ստորագրել դաշնակցային հարաբերությունների մասին պայմանագիր։ «Մենք այսօր պատմություն կերտեցինք: Այս պատմությունը կիրականացվի ի շահ  Ադրբեջանի և Ուզբեկստանի մերձավոր ժողովուրդների»,- նշել է Ուզբեկստանի նախագահը։