Իրանի նախագահ Մասուդ Փեզեշքիանը Նյու Յորքում լրագրողների հետ զրույցում հերքել է Իրանի կողմից Ռուսաստանին բալիստիկ հրթիռներ մատակարարելու մասին տեղեկությունը։ Նա հայտարարել է, որ Թեհրանը երբեք չի աջակցել Ռուսաստանի ներխուժմանը Ուկրաինա: Փեզեշքիանն ընդգծել է, որ Իրանը պատրաստ է բանակցել Արևմուտքի երկրների հետ Ուկրաինայի պատերազմի հարցով։ «Մենք պատրաստ ենք նստել եվրոպացիների և ամերիկացիների հետ բանակցությունների սեղանի շուրջ՝ երկխոսության և քննարկման համար։ Մենք երբեք հավանություն չենք տվել ուկրաինական տարածքի դեմ ռուսական ագրեսիային»,- ասել է նա։

Կրեմլը Իրանի «ինքնիշխան» դիրքորոշումն է համարում ռուս-ուկրաինական պատերազմի վերաբերյալ այս հայտարարությունը և կշարունակի իր դիրքորոշումը հասցնել Իսլամական Հանրապետության ղեկավարությանը, հայտարարել է ՌԴ նախագահի մամուլի քարտուղար Դմիտրի Պեսկովը։

«Դա Իրանի ինքնիշխան դիրքորոշումն է։ Մենք կշարունակենք մեր իրանցի ընկերներին պարզաբանել մեր դիրքորոշումը և այն ամենը, ինչ կապված է Ուկրաինայի շուրջ այս հակամարտության հետ։ Եվ մեր համագործակցությունը տարբեր ոլորտներում շատ դրական է զարգանում։ Մենք ակնկալում ենք, որ այդ փոխգործակցությունը հետագայում ևս կընդլայնվի»,- ասել է Պեսկովը՝ պատասխանելով հարցին, թե ինչպես է Կրեմլն արձագանքել Իրանի նախագահի հայտարարություններին, և արդյոք ուկրաինական պատերազմը չի՞ բարդացնում Ռուսաստանի Դաշնության և Իրանի փոխգործակցությունը։