Ադրբեջանի արտաքին գործերի նախարարությունը հերթական անգամ ջղաձգվել է: Ադրբեջանի ԱԳՆ մամուլի
ծառայության ղեկավար Այխան Հաջիզադեն Ֆրանսիայից պահանջում է վերջ դնել
«տարածաշրջանում ապակառուցողական գործունեությանը»՝ մեկնաբանելով Ֆրանսիայի
նախագահ Էմանուել Մակրոնի հայտարարություններն առ այն, որ «Ֆրանսիան ուս ուսի
կանգնած է Հայաստանի հետ՝ նրա վրա ճնշումների և Ադրբեջանի տարածքային
հավակնությունների ֆոնին»։
«Ֆրանսիայի նախագահ Էմանուել Մակրոնի
հայտարարությունները սեպտեմբերի 25-ին ՄԱԿ-ի Գլխավոր ասամբլեայում ելույթի ժամանակ
հանդիսանում են Ֆրանսիայի կողմնակալ հայանպաստ մոտեցման ևս մեկ օրինակ ինչպես մեր
երկրի, այնպես էլ ողջ խաղաղության գործընթացի նկատմամբ»,- իր մեկնաբանության մեջ
ընդգծում է Ա. Հաջիզադեն։
Նրա խոսքով՝ «անընդունելի է, որ Ֆրանսիան, որը Երևանին ռևանշիզմի է նախապատրաստում և սպառազինում
է այդ երկրին, ադրբեջանական կողմին մեղադրի ճնշման մեջ»։
