Իրան-Հայաստան բարեկամական խմբի ղեկավար է ընտրվել Իրանի մեջլիսի
հայ պատգամավոր Արա Շահվերդյանը։
Վերջինս մոտ օրերս Իրանի պատվիրակության հետ ժամանելու է Հայաստան։
Պատգամավորը Civic.am-ի հետ զրույցում նշեց, որ իրենց է միանալու նաև Իրանի արդյունաբերության
նախարարը։ Պատվիրակությունը մասնակցելու է Եվրասիական հանձնաժողովի նիստին։ Բացի պատվիրակության
անդամներից` ներկա են լինելու նաև գործարարներ Իրանից և Հայաստանից։ Նպատակը՝ Իրան-Հայաստան
տնտեսական համագործակցության մակարդակը բարձրացնելն է։
Շահվերդյանը ընդգծեց նաև Իրան-Հայաստան սահմանի անձեռնմխելիության
կարևորությունը Իրանի համար։ Պատգամավորի խոսքով՝ անկախ Իրանում նախագահի փոփոխությունից
Իրանի արտաքին քաղաքականությունը մնում է նույնը, և Իրան-Հայաստան սահմանի անփոփոխությունը
կարմիր գիծ է նրա համար։ «Բնականաբար Հայաստանի դիրքորոշումը այս հարցում Իրանը հարգում
է։ Գիտենք նաև, որ այդ ճանապարհի վրա հսկողությունը Հայաստանը փորձում է ու պնդում
է, որ ինքը պետք է անի և երրորդ երկրի թույլ չտա դա անել։ Իրանը հարգում ու հաստատում
է Հայաստանի այս դիրքորոշումը։ Բնականաբար, Հայաստանը իր, իր ժողովրդի շահերից կախված
և հանուն պետականության դիրքորոշումներ ու քայլեր է անում, Իրանն էլ՝ նկատի առնելով այս քայլերը հարգում է նման մոտեցումները»,
- ասաց Շահվերդյանը։
Նախորդ տարի, սակայն, Արա Շահվերդյանը News.am-ին տված հարցազրույցում
մտահոգություն էր հայտնել, որ Փաշինյանն Ալիևի հետ կուլիսային պայմանավորվածություն
ունի միջանցքի հարցում։ Շահվերդյանը արձագանքելով այս հարցազրույցին ասաց․ «Կարծեմ, մեկ տարի
առաջ եմ հարցազրույց տվել, այդ ժամանակ դրսում էի, և կարծեմ, կա՛մ հարցին լավ
չեմ անդրադարձել, կա՛մ պատասխանս լավ չի հասկացվել։ Համենայն դեպս, Զանգեզուրի միջանցքի
հարցում Ադրբեջանը 30 տարի է օգտվում է Իրանի տարածքով։ Եթե պետք է ինչ-որ ուժեր գան
էս տարածաշրջան ու Իրանի և Հայաստանի միջև խոչընդոտներ առաջացնեն, հայկական կողմն էլ
վերջին մեկ-երկու տարին ցույց է տալիս, որ դեմ է դրան, մենք նշում ենք, որ այդ միջանցքը
եթե լինի՝ վտանգելու է Հայաստանի և Իրանի սահմանը։ Իսկ եթե Հայաստանը վերահսկի՝ դա
նորմալ մի բան է, այդպիսի միջանցքներ կան նաև մեր մոտ Իրանում»։
Շահվերդյանը նշեց, որ իր մտահոգությունը եղել է այն, որ Թուրքիան
կամ Ադրբեջանը, կամ այլ ուժեր կարող են փորձել ուժով խլել ու կտրել Իրան-Հայաստան սահմանը
ու թե՛ Հայաստանը, թե՛ Իրանը պետք է թույլ չտան դա։ Իրանը, պատգամավորի խոսքով, այդ
հարցում աջակցում է Հայաստանին նաև այն պատճառով, որ Հայաստանը ԵԱՏՄ անդամ է, Իրանն
էլ այդ կառույցում դիտորդի կարգավիճակ ունի, ու Հայաստանի հետ սահմանը կարևոր է նաև
ԵԱՏՄ անդամ մյուս երկրների՝ ինչպես նաև ԵՄ երկրների հետ հարաբերվելու, կապեր և ելք
ունենալու առումով։
Վովա Հակոբյան
