Ռուսաստանի Արտաքին հետախուզության ծառայության ղեկավար Սերգեյ Նարիշկինը Բաքվում լրագրողների հետ զրույցում կրկին հայտարարել է, որ ԱՄՆ-ը փորձում է ազդել Վրաստանի խորհրդարանական ընտրությունների վրա, որոնք կանցկացվեն հոկտեմբերի 26-ին։

 Նրա խոսքով՝ Եվրոպայում անվտանգության և համագործակցության կազմակերպության (ԵԱՀԿ) Ժողովրդավարական ինստիտուտների և մարդու իրավունքների գրասենյակը (ԺՄԻԳ) «Ամերիկայի Միացյալ Նահանգների Պետդեպարտամենտի պահանջով» պատրաստել է «միջանկյալ զեկույց, որում պարունակվում է թեզ, թե իբր Վրաստանում չկան արդար և բաց ընտրությունների համար պայմաններ»։ Սա, իհարկե, չի համապատասխանում իրականությանը»,- ասել է Նարիշկինը:

«Այս ակցիայի նպատակն է կոպտորեն, բավականին լկտիաբար միջամտել Վրաստանի ներքին գործերին, փորձել նորից թույլ չտալ իշխանության գալ առողջ, ազգային կողմնորոշմամբ ուժերին։ Բայց ես վստահ եմ, որ Վրաստանի ժողովուրդը կընտրի... կկատարի ճիշտ ընտրություն»,- ասել է նա։