Վրաստանի մայրաքաղաքի փողոցներում հայտնվել են իշխող «Վրացական երազանքի» նախընտրական նոր պաստառներ։ Դրանց վրա արնակարմիր ֆոնին պատկերված են ընդդիմության ներկայացուցիչները և ձեռք, որը նրանց վզափոկով բռնել է, իսկ մակագրությունը այսպիսին է՝ «Չկա՛ պատերազմ. Չկա՛ ագենտուրա»:

Նախընտրական քարոզարշավի սկզբից ի վեր իշխող կուսակցության գովազդային պաստառներն ու տեսահոլովակները բազմիցս քննադատության առիթ են դարձել ոչ միայն երկրի ներսում, այլև դրա սահմաններից դուրս։ Ավելի վաղ «Վրացական երազանք»-ն իր գովազդում պատերազմից ավերված Ուկրաինայի քաղաքները համեմատել էր Վրաստանի իշխող կուսակցության օրոք վերականգնված կամ կառուցված շենքերի հետ։

Երեք հեռուստաալիքներ՝ «Մտավարի»-ն, «Ֆորմուլա»-ն և «Պիրվելի»-ն, հրաժարվել են հեռարձակել այդպիսի գովազդային հոլովակներ՝ հայտարարելով, որ դրանք պարունակում են ռազմական քարոզչություն, վախ են սերմանում ընտրողների մեջ և խախտում են էթիկայի նորմերը: Սակայն Վրաստանի հաղորդակցությունների ազգային հանձնաժողովը դա համարել է խախտում և այդ հեռուստաալիքների նկատմամբ կազմել է արձանագրություն վարչական իրավախախտումների վերաբերյալ։