Պարզվում է՝
ոչ բոլորն են պատրաստ նույն ոգևորությամբ մասնակցել Բաքվում կայանալիք COP29
համաժողովին, որն, ըստ էության, նպատակ ունի Բաքվի ռեժիմի ձեռքերը «լվանալ»
Լեռնային Ղարաբաղի հայ բնակչության արյունից և արդարացնել էթնիկ զտումները։
Մասնավորապես, COP29-ին մասնակցելուց
հրաժարվելու մասին արդեն հայտարարել է Նորվեգիայի վարչապետ Յոնաս Գարա Ստյորեն։
Նրա որոշումը անմիջապես պատռել է Բաքվի կեղծ բարի կամքի դիմակը, և Նորվեգիայի վրա
ցեխ են շպրտել լրատվամիջոցները:
Ինչպես հայտնի է դարձել Sky News-ին, Մեծ
Բրիտանիայի թագավոր Չարլզ III-ը նույնպես չի մասնակցի կլիմայական համաժողովին՝
առանց բացատրելու պատճառը:
Փարիզի քաղաքապետ Անն Իդալգոն հայտարարել
է, որ չի մասնակցի Բաքվում կայանալիք ՄԱԿ-ի Կլիմայի փոփոխության հարցերով համաժողովին
(COP29) ի նշան դատապարտման ադրբեջանական ռեժիմի, որը մեղավոր է 2023 թվականի
սեպտեմբերին հայերի էթնիկ զտումների համար:
Բաքվում կայանալիք ֆորումին չեն ցանկանում
մասնակցել ոչ միայն առանձին քաղաքական գործիչներ, այլև կլիմայական հարցերով
մասնագիտացած ամբողջական կազմակերպություններ։ Շատ ընկերություններ իրենց
քննարկումները տեղափոխում են այլ ֆորումներ: Մասնավորապես, նրանք հատուկ
ուշադրություն են սևեռել սեպտեմբերին Նյու Յորքում կայանալիք Կլիմայի շաբաթվա վրա,
որը համընկնում է ՄԱԿ-ի Գլխավոր ասամբլեայի և ՄԱԿ-ի կենսաբազմազանության
համաժողովի հետ, որը հայտնի է որպես COP16, որը կանցկացվի հոկտեմբերին
Կոլումբիայում։
ԱՄՆ Առևտրի պալատի Գլոբալ էներգետիկայի ինստիտուտի
քաղաքականության հարցերով փոխնախագահ Դեն Բայերսը COP29-ը անվանել է անորոշ և
հնարավոր չի համարում դրանում բնապահպանության ոլորտում իրական որոշումների կայացումը:
Ինչպես գրում է Politico-ն,
մասնակցությունից հրաժարվելու որոշ պատճառներ պրոզայիկ են. մտահոգություններ կան
հյուրանոցային համարներ ձեռք բերելու կամ նույնիսկ Բաքվի ծայրամասում ֆորումի վայր
մուտք գործելու վերաբերյալ: Մյուսները քաղաքական են. սպասվում է, որ COP29-ն ավելի
զուսպ կլինի, քան հաջորդ տարի Դուբայում կամ Բրազիլիայում բանակցությունները, և
ընկերություններն արդեն պատրաստվում են այդ միջոցառմանը, որտեղ երկրները կավարտեն
մինչև 2035 թվականի կլիմայական ռազմավարությունները:
Վերենա Ռադուլովիչը՝ Կլիմայի
և էներգետիկ լուծումների հարցերով կենտրոնի բիզնեսի հետ փոխազդեցության
փոխնախագահը, ասում է, որ COP29-ին մասնակցելուց հրաժարվելը պայմանավորված է այն
բանով, որ ընկերությունները ցանկանում են առանձնացնել կլիմայի ոլորտում իրենց
աշխատանքը COP-ից: Ընկերությունները սկսում են գիտակցել, որ չնայած COP-ը
արժեքավոր է, կան այլ միջոցներ, որոնց օգնությամբ նրանք կարող են ցուցադրել իրենց
առաջնորդությունը կլիմայի ոլորտում:
