«Մեր հիմնական արտաքին քաղաքական
առաջնահերթությունը Եվրամիությանն ինտեգրումն է»,- դեկտեմբերի 2-ին կառավարության
նիստում հայտարարել է Վրաստանի վարչապետ Իրակլի Կոբախիձեն։ Վրաստանի կառավարության
ղեկավարը հույս է հայտնել, որ թե՛ ԱՄՆ-ի, թե՛ ԵՄ-ի հետ հարաբերությունները
«շանտաժի փոխարեն որակապես կբարելավվեն»։ Կոբախիձեն ընդգծել է, որ «Վրացական
երազանքը» արտաքին քաղաքականության ուղղությամբ «հավակնոտ ծրագրեր» ունի։
«Մեր նախընտրական ծրագրի համաձայն՝ մինչև
2028 թվականը մենք պետք է կատարեինք պարտավորությունների ավելի քան 90 տոկոսը,
որոնք նախատեսված են ասոցացման օրակարգով և ազատ առևտրի համաձայնագրով, և իհարկե
այդ խոստումը կկատարվի։ Մենք նաև շատ մեծ հույսեր ենք դնում ինչպես Ամերիկայի
Միացյալ Նահանգների, այնպես էլ Եվրամիության հետ հարաբերությունների որակական
վերբեռնման վրա։ Դոնալդ Թրամփի երդմնակալությունը տեղի կունենա հունվարի 20-ին, հետևաբար
Միացյալ Նահանգներն ու Եվրամիությունը կունենան նոր առաջնորդ: Կարծում ենք, որ այս
առաջնորդների պայմաններում հարաբերությունները կարող են որակապես վերսկսվել։ Մենք
պետք է ամեն ինչ անենք, որ հարաբերությունները լինեն առողջ»,- հայտարարել է Վրաստանի
վարչապետը։
Կոբախիձեն հաստատել է, որ 4 տարվա ընթացքում
այդ հարաբերություններում «առաջացել են լուրջ խնդիրներ», «արհեստական խոչընդոտներ են ստեղծվել» Վրաստանի եվրաինտեգրման ճանապարհին։ Մեկնաբանելով երկրում բարձրացած բողոքը՝ կառավարության ղեկավարն ասել է, որ Վրաստանում տեղի չի ունենա
«Ազգային մայդան»։
«Մենք տեսնում ենք, որ եղել է համաձայնեցված
և նախապես գրված ծրագիր, և այդ ծրագրի իրականացմանը ներգրավվել է օտարերկրյա
ֆինանսավորում... Ուստի որոշ մարդիկ չէին ցանկանում, որ «թափանցիկության մասին»
օրենքն ընդունվի, որպեսզի հեղափոխական սցենարները ֆինանսավորվեին անորոշ կերպով։
Այս 4 տարիներից 3-ի ընթացքում մենք օտարերկրյա ֆինանսավորմամբ նկատել ենք
հեղափոխական գործընթացներ... Դա ճիշտ վերաբերմունք չէ մեր երկրի նկատմամբ, մենք
արժանի երկիր ենք, մենք հպարտ ենք մեր անկախությամբ ու ինքնիշխանությամբ և,
իհարկե, մինչև վերջ զգույշ ենք լինելու, մենք ոչ ոքի հնարավորություն չենք տա օտարերկրյա
ինտերվենցիայի միջոցով խարխլել մեր անկախությունն ու ինքնիշխանությունը»,-
հայտարարել է Իրակլի Կոբախիձեն։
