Ուկրաինական բանակն ուժ չունի ինքնուրույն վերադարձնելու Ռուսաստանի կողմից գրավված բոլոր տարածքները: Կիևը խաղաղության հասնելու դիվանագիտական ուղիներ է փնտրելու: Այս մասին Ուկրաինայի նախագահ Վլադիմիր Զելենսկին հայտարարել է Kyodo News-ին տված հարցազրույցում։
Նա նշել է, որ գործընկերների կողմից Ուկրաինային աջակցությունը «բավարար չէ», և կոչ է արել ՆԱՏՕ-ին հնարավորինս շուտ հրավիրել Կիևին Դաշինքին անդամակցելու շուրջ բանակցությունների։
Ուկրաինայի նախագահը բացահայտ խոստովանել է, որ Ուկրաինայի զինված ուժերի
համար դժվար է ուժով վերադարձնել Ռուսաստանի կողմից օկուպացված երկրի տարածքները՝
ներառյալ Ղրիմը. «Մեր բանակը դրա համար բավարար ուժ չունի։ Սա ճշմարտությունն է։ Մենք պետք է դիվանագիտական լուծումներ գտնենք»։
Միաժամանակ Զելենսկին նշել է, որ նման քայլերը կարող են
դիտարկվել «միայն այն դեպքում, երբ մենք իմանանք, որ բավականաչափ ուժեղ ենք»,
որպեսզի Ռուսաստանը չկարողանա սկսել «նոր
ագրեսիա Ուկրաինայի դեմ»։
Զելենսկին ընդգծել է, որ պատերազմը թևակոխել է «դժվար ժամանակաշրջան»։ Նրա
հայտարարությունները, ըստ երևույթին, ազդարարում են նախկին դիրքորոշումից հեռանալու
մասին, թե՝ Ուկրաինան պայքարելու է Ռուսաստանի կողմից գրավված բոլոր տարածքները
վերադարձնելու համար:
