ՌԴ նախագահի մամուլի քարտուղար Դմիտրի Պեսկովը հայտարարել
է, որ Կրեմլը վարկածներ առաջ չի քաշի Ղազախստանի Ակտաուի մերձակայքում Azerbaijan
Arilines-ի ինքնաթիռի կործանման պատճառների մասին, մինչև չավարտվի հետաքննությունը,
հայտնում է «Ինտերֆաքս»-ը։
«Մինչև հետաքննության եզրակացությունները ինչ-որ վարկածներ
առաջ քաշելը ճիշտ չի լինի։ Մենք, իհարկե, դա չենք անի, և ոչ ոք չպետք է դա անի։ Պետք է սպասել հետաքննության ավարտին»,- ասել է Պեսկովը ճեպազրույցի ժամանակ։
Ղազախստանում Azerbaijan Arilines-ի ինքնաթիռի կործանումից հետո օդանավի
պոչի հատվածում չվնասված բեկորների վրա նկատվել էին հետքեր, որոնք նման էին զենիթային
հրթիռների խոցող տարրերի։ Ի հայտ էր եկել վարկած, որ ինքնաթիռը կարող էր խոցվել
ռուսական ՀՕՊ-ի կողմից, որոնք հետ են մղել ուկրաինական անօդաչուների դեկտեմբերի 25-ի
գրոհը։ Ղազախստանի իշխանությունները նման ենթադրություններն անվանել են
«շահարկում»։
