Լոս Անջելեսում բռնկվել են անտառային հրդեհներ, հայտարարվել է արտակարգ դրություն:

Հրդեհը սկսվել է հունվարի 7-ին Սանտա Մոնիկայի և Մալիբուի միջև տեղակայված Փասիֆիկ-Փալիսեյդս ափամերձ շրջանում։ Նրա տարածքը կազմում է 1182 հեկտար։ Հրդեհից ոչնչացել են բնակելի շենքեր, մոտ 30 հազար մարդ տարհանվել է։ Հրդեհի հետևանքով տուժածներ չկան։  

Փասիֆիկ-Փալիսեյդս շրջանում ապրում են մի քանի հոլիվուդյան աստղեր (օրինակ՝ այնտեղ է գտնվում Բեն Աֆլեքի տունը)։ Դերասան Ջեյմս Վուդսը X սոցցանցում հրապարակել է տարհանման տեսանյութ կրակով պատված տարածքից։

Եվս մեկ հրդեհ Կալիֆոռնիայում տեղի է ունեցել Լոս Անջելեսից 50 կիլոմետր հեռավորության վրա, հրդեհի տարածքը կազմել է 160 հեկտար։ Լոս Անջելեսի շրջանում ավելի քան 96 հազար մարդ մնացել է առանց էլեկտրականության։ Տարհանման գոտում է հայտնվել ԱՄՆ փոխնախագահ Քամալա Հարիսի նստավայրը, հայտնում է NBC News-ը։