ՌԴ նախագահ Վլադիմիր Պուտինն ու ԱՄՆ ընտրված նախագահ Դոնալդ Թրամփը «պատրաստակամություն են հայտնում շփվելու հանդիպման շրջանակներում, սակայն այս ուղղությամբ դեռ հստակություն չկա», հայտարարել է ՌԴ նախագահի մամուլի քարտուղար Դմիտրի Պեսկովը։ Նրա խոսքով՝ «երկու քաղաքական առաջնորդների հանդիպման համար ոչ մի նախապայման հարկավոր չէ»։
«Նախագահ Պուտինը բազմիցս հայտարարել է միջազգային առաջնորդների, այդ թվում՝ ԱՄՆ նախագահի և, այդ թվում, Դոնալդ Թրամփի հետ շփումների համար բաց լինելու մասին: Նախագահն ինքը բազմիցս խոսել է այդ մասին, մենք բազմիցս խոսել ենք այդ մասին: Դրա համար ոչ մի պայման չի պահանջվում: Պահանջվում են երկխոսություն վարելու, առկա խնդիրները երկխոսության միջոցով լուծելու փոխադարձ ցանկություն և քաղաքական կամք»,- լրագրողներին ասել է Պեսկովը։
«Մենք տեսնում ենք, որ պարոն Թրամփը նույնպես հայտարարում է խնդիրները
երկխոսության միջոցով լուծելու իր պատրաստակամության մասին: Մենք ողջունում ենք
դա»,- ընդգծել է նա։
Պեսկովի խոսքով՝ հանդիպման կազմակերպման հետ
կապված դեռ «հստակություն չկա, ինչպես նախկինում»։ «Ելնում ենք հանդիպման փոխադարձ
պատրաստակամությունից: Ըստ երևույթին, այն բանից հետո, երբ պարոն Թրամփը մտնի
Օվալաձև աշխատասենյակ, ինչ-որ տեղաշարժ կլինի»,- ասել է Կրեմլի ներկայացուցիչը։
Լրագրողների խնդրանքին՝ մեկնաբանել
Թրամփի հայտարարությունը Պուտինի և Չինաստանի նախագահ Սի Ցզինպինի հետ եռակողմ
հանդիպման պատրաստակամության մասին, Պեսկովը պատասխանել է, որ այդ հարցում էլ
հստակություն չկա։
